Роналду “Манчестер Юнайтед” раҳбариятига иккита шарт қўйди

Португалиялик ҳужумчи Криштиану Роналдунинг ҳуқуқлари билан шуғулланаётган футбол агенти Хорхе Мендеш "Манчестер Юнайтед" раҳбарияти билан учрашув ўтказди. Бу ҳақда “COPE” нашри хабар берди.

Манбага кўра, 37 ёшли форварднинг вакили "қизил иблислар" раҳбариятига бир қанча шартлар қўйган. Мендеш манкунианликлар Криштиану билан шартномани янгилашини ва шундан сўнг уни бир мавсумга ижарага беришларини истамоқда. Боиси, Роналду Чемпионлар лигасида қатнашадиган клубга ўтиши керак.

Португалияликнинг "Юнайтед" билан амалдаги шартномаси 2023 йилнинг ёзига қадар амал қилади. Олдинроқ ҳужумчига "Атлетико" ва "Челси" клублари қизиқиш билдираётгани ҳақида хабарлар тарқалган эди.