Роналду “Манчестер Юнайтед”нинг муаммоларини ҳал қилиб бермоқчи

“Манчестер Юнайтед”нинг собиқ футболчиси Криштиану Роналду айни пайтда Саудия Арабистонининг “Ан-Наср” клубида тўп тепаётганига қарамай, аввалги клубига бефарқ эмаслигини кўрсатди.

39 ёшли футболчи “Манчестер Юнайтед”нинг муваффақиятсизликларига уни бошқараётган мураббийлар сабабчи эмаслигини таъкидлади.

- “Манчестер Юнайтед”даги вазиятга баҳо беришдан аввал, бу клубни ёқтиришим ва унга бор яхшиликларни раво кўришимни айтишим керак. Муаммо бош мураббийда эмас.

Агар мен клуб хўжайини бўлсам, нималар бўлаётганини аниқлаб, камчиликларни ва ўзим ёмон деб билган жиҳатларни тўғрилайман, - деди Криштиану Роналду.

“Манчестер Юнайтед” Криштиану Роналду икки марта ўйнаган ягона жамоа ҳисобланади. Португалиялик юлдуз бу клуб сафида 2003-2009 ва 2021-2022 йилларда тўп тепган.