Роналду Ўзбекистонга қарши ўйинда бир йўла тўртта тарихий рекорд ўрнатди

Португалия терма жамоаси ҳужумчиси Криштиану Роналду жаҳон чемпионатларидаги голлари сони бўйича мамлакатининг янги рекордини ўрнатди.

41 ёшли форвард 2026 йилги жаҳон чемпионати гуруҳ босқичида Ўзбекистонга қарши ўйинда (5:0) дубль қайд этиб, жаҳон чемпионатларидаги 9 ва 10-голларини урди.

Шу тариқа, Роналду Португалия футболи афсонаси Эйсебионинг жаҳон чемпионатларида урган 9 та голлик рекордини ортда қолдирди.

Бундан ташқари, Роналду жаҳон чемпионатлари тарихида дубль қайд этган энг ёши катта футболчига айланди. У бу натижага 41 ёш 138 кунлигида эришди ва бир кун аввал Австрияга қарши баҳсда (2:0) 38 ёш 363 кунлигида дубль қайд этган аргентиналик Лионель Мессининг рекордини янгилади.

Шунингдек, Роналду ўзининг жаҳон рекордини ҳам яхшилади. Ўзбекистон дарвозасига киритилган иккинчи гол унинг клублар ва миллий терма жамоа сафидаги фаолиятидаги 975-голи бўлди. Энди у 1000 та голлик маррага етиш учун яна 25 та гол уриши керак.

Бундан ташқари, португалиялик футболчи Европа чемпионатлари ва жаҳон чемпионатларида камида 10 тадан гол урган тарихдаги илк футболчига айланди. У Европа чемпионатлари тарихида 14 та гол билан энг яхши тўпурар ҳисобланади.