Роналду рекорди барбод бўлишидан хавотирда

Чемпионлар лигаси ярим финал жавоб учрашувида Карим Бензема “Манчестер Сити” дарвозаси томон белгиланган пенальтини аниқ бажариб, жамоасининг 3:1 ҳисобидаги ғалабасини таъминлади.

“Реал”ни финалга олиб чиққан бу гол франциялик ҳужумчи учун Чемпионлар лигасининг бу мавсумидаги 15-гол бўлди.

Карим собиқ жамоадоши Криштиану Роналдунинг қитъадаги энг нуфузли турнирда ўрнатган рекордига максимал даражада яқин келди.

Роналду 2013-2014 йилги мавсумда Чемпионлар лигасида 17 та гол урган ва бу рекорд кўрсаткич ҳисобланади.

Бензема 28 май куни “Ливерпуль”га қарши бўладиган финал ўйинида иккита гол урса, португалиялик юлдузнинг рекордини такрорлайди.