Роналду замонавий футболнинг энг зўр уч футболчиси номини айтди

Португалия терма жамоаси ва “Ан-Наср” клуби тўпурари Криштиану Роналду замонавий футболдаги энг кучли уч футболчи номини айтди.

- Энг зўр уч нафар футболчи рўйхатига ўзимни, Лионель Мессини ва Зинедин Зиданни киритган бўлардим, - деди Криштиану Роналду Give me Sport нашрига.

Роналду профессионал фаолияти давомида “Спортинг”, “Манчестер Юнайтед”, “Реал”, “Ювентус”, “Ан-Наср” клубларида тўп тепган. 40 ёшли футболчи ҳозиргача рақиблари дарвозасини 931 маротаба ишғол қилиб, жаҳон футболида энг кўп гол урган рекордчи ҳисобланади.

Лионель Месси эса, “Барселона”, “Пари Сен-Жермен”да ўйнаб, айни пайтда уммонортида  “Интер Майами” шарафини ҳимоя қилмоқда. Месси саккиз бор “Олтин тўп”ни қўлга киритиб, бу борада мутлақ рекорд ўрнатган.

Ўз даврида “Канн”, “Бордо”, “Ювентус” ва “Реал”да порлаган Зинедин Зидан 2006 йили профессионал футболчилик фаолиятини якунлаган.