Россия клуби Остон Ўруновни сотиб олиш фикридан қайтди. Сабаби...

Ўзбекистон терма жамоаси ва Москванинг “Спартак” клуби ярим ҳимоячиси Остон Ўруновнинг келажаги ҳамон номаълумлигича қолмоқда.

Аввалроқ, легионеримизга "Химки" қизиқиш билдиргани, бироқ томонлар Остоннинг маоши борасида келиша олмагани хабар қилинганди.

“Қизил-қоралар” клуби кенгаши аъзоси Роман Терюшков “RB Sport” нашрига берган интервьюсида Остон Ўруновнинг трансферига алоҳида тўхталиб ўтди.

Унинг айтишича, “Химки” оптимал таркибни танлаб бўлган. Клуб ҳозиргача ўзи учун керакли харидларни амалга оширган ва шу боис, улар Ўруновни сотиб олиш фикридан қайтган.

Маълумот ўрнида, терма жамоамиз аъзосига бир қанча Россия, Осиё ва ўзбек клублари қизиқиш билдирди. Хусусан, Наманганнинг “Навбаҳор”, Эроннинг “Истиқлол” ва Жанубий Кореянинг “Чонбук Моторс” жамоалари Остонни ўз сафига қўшиб олишга тайёр эди.