Рўзиқул Бердиев: "Бу гуруҳдаги жамоаларнинг салоҳияти финалда ўйнашга қурби етади"

Ўзбекистон Кубогида “Насаф” “Навбаҳор”ни қабул қилиб 0:1 ҳисобида ютқазиб қўйди. Учрашувдан кейинги матбуот анжуманида “Насаф” устози Рўзиқул Бердиев мағлубият сабабларини айтди.

- Ўйин биз кутгандек бўлмади. Ижобий натижага ҳаракат қилишимиз керак эди. Бугунги учрашувни муаммо билан бошладик. Голбанни жароҳат олиб сафдан чиқиши кўп ўзгаришлар қилишимизга тўғри келди, таркибда ҳам, майдондаги жойлашувда ҳам. Биз деярли бир ҳимоячи билан ўйнашга мажбур бўлдик. Шунга қарамасдан ўйинни ўз томонимизга оғдириш учун вазиятлар ярата олдик. Лекин рақиб дарвозабонининг фаол ҳаракат “Навбаҳор”нинг ғалабасида асосий омил бўлди.

- Голбаннинг ҳолати қандай?

- Мусукулларини тортиб олган дейишди. Ҳозир чуқурроқ ўрганамиз.

- “Ўлим гуруҳи” дегандингиз, ҳақиқатан шунга ўхшаяпти. “Насаф” учта фронтда курашади. ОЧЛ, Суперлига, Ўзбекистон Кубоги. Бу қийинчилик туғдирадими?

- Қийинчилик бўлаётгани йўқ, бир ҳафтада бир ўйин ўтказяпмиз. Ҳар бир учрашувга жиддий тайёргарлик олиб боряпмиз. Ҳақиқатда гуруҳимизда яхши жамоалар жамланган. Агар шу гуруҳдаги иккита клуб финалда учрашиб қолса ажабланмайман. Бўлиши мумкин. Чунки бу гуруҳдаги жамоалар ўйини ҳам, салоҳияти ҳам финалда ўйнашга қурби етади.

- 22-дақиқада Голбанни жароҳати сабабли мажбурий ўзгаришни қилдингиз. Унга қўшиб Жигаурини ҳам захирага олдингиз. У буни ҳайрат билан қабул қилди. Бунга нима сабаб бўлди?

- Майдондаги жойлашув схемамиздан келиб чиқиб. Бошқа қанот ҳимоячиси йўқлиги учун биз учта ҳимоячи билан ўйнашга ҳаракат қилдик. 3-4-3 схемасига ўтганимиз учун буни амалга оширдик ва Жигаурига тўғри тушунтирдик, у буни тўғри қабул қилди. Чунки бунга мажбур эдик. Бизда қанотда ўйнайдиган футболчи умуман қолмаганди. Шунга Ғолибни ўйнатаётгандик. Голбан чиқиб кетгач, Ғолибни ўртага олдик. Ўнг қанот ҳимоячимиз йўқлиги учун схемамизни ўзгартиришга мажбур бўлдик.

- Захирадан тушганлар ўйин тезкорлигини ошира олдиларми?

- Эътибор берган бўлсанглар, охирги пайтларда кам ўйнаётган футболчиларга имкон бераётгандик. Кубок ўйини бўлгани учун уларни захирада ушлаб, кейин имконият бердик. Лекин биз кутган ўйинни ёрқин кўрсатиб бера олмадилар. Буни ўрганиб чиқамиз. Уларни ўйин амалиётига эга бўлиш учун майдонга туширгандик. Голбанни жароҳати боис кўп нарсани ўзгартиришга тўғри келди. Ўзларинглар ҳам ҳисобласанглар ҳимояда биргина Ғолиб билан ўйнадик десак ҳам бўлади. Шунга қарамай, қайсидир жиҳатларда яхши ҳаракат қилдик. Аммо айтганимдек, дарвозабоннинг яхши ҳаракати рақибга ғалабани тортиқ қилди.

- Бугунги “Навбаҳор”ни таркиби яхши. Фикрингизча, “Навбаҳор” таркиби кучлими ёки Бабаян кучлими?

- Футболчи ёки мураббийни ажратиб кўрсатиш нотўғри. Бу ерда жамоа ҳисобга олинади. “Навбаҳор” ёки мураббийлар штабини муҳокама қилмоқчи эмасман. Бу умумий савол. “Навбаҳор” неча йиллардан бери олдига чемпионлик ва Кубокни ютишни мақсад қилиб қўяди. Жамоага бўлган эътибор жуда юқори. Таркибида 7-8 нафар терма жамоа ўйинчилари бор. Умумий қилиб айтганда, яхши жамоа. Ҳозирда энг яхшилардан бири. Таркибга ва мураббийлар штабига қарасангиз ҳам бу нарса кўриниб турибди.