Рўзиқул Бердиев: "Негатив саволларни камроқ ўйлагандим, бугун хурсандчилик қилайлик, қолганини тўғрилаймиз"

“Насаф” клуби Осиё Чемпионлар лигасининг 2-турида ўз уйида Қатарнинг “Ал Садд” клубини 3:1 ҳисобида мағлуб этди. Ишончли ўйин ва муносиб ғалаба қўлга киритилгани барча ишқибозларни қувонтирди. Ушбу баҳсдан кейин “Насаф” бош мураббийи Рўзиқул Бердиев фикрларини билдирди.  

- Мухлисларни ғалаба билан табриклайман. Бугун йигитларга алоҳида миннатдорчилик билдиришимиз керак, улар катта меҳнат қилишди. Ишқибозлар ҳам яхши қўллаб-қувватлашди. Ўйинга келадиган бўлсак, рақибни ўрганиб чиққанимизда кучли ва кучсиз тарафларини билардик ва шунга яраша тайёрлагандик. Ўйлайманки, рақибга ҳеч қанақа имконият қолдирмадик. Футболдаги барча яхши жиҳатлар бугун ўйинимизда бор эди. Буни амалда кўрсата олдик. Шунинг учун ишончли ғалабага эришдик.

- Мана шу ўйин Ўзбекистон чемпионатида ҳеч бўлмаса 50 фоизга кўрсатилса ҳам анча яхши натижа бўлмасмиди?

- Ўйинлар баъзида бир-бирига ўхшамайди. Бу ўйин билан чемпионатимизни таққосламаган бўлардим. Катта ўйинларга мотивация, иштиёқ бошқача бўлади. Олдин ҳам айтгандим, биз билан очиқроқ футбол ўйнайдиган жамоа билан енгилроқ ўйнаймиз. Бугун ҳам мана шундай бўлди. Биз ҳар бир ўйинга ғалаба учун тушамиз, бу муҳим. Лекин қайсидир ўйинларда биз кутгандек бўлмайди. Лекин аниқ айта оламанки, биз ҳар бир беллашувга жиддий ёндашамиз. Азиз жуда муҳим голларни урди. Иккаласини ҳам керакли пайтда урди.

- “Насаф”нинг ғалабаси Ўзбекистоннинг обрўи ва эътибори. “Насаф” чиройли ўйнади. Аммо 80-дақиқадан сўнг жамоа негадир ўйинни “ташлаб” қўйди. Рақиб бундан фойдаланиб ҳисобни қисқартирди. Бу Суперлигада ҳам кузатиляпти. Буни қандай изоҳлайсиз?

- Ўйинларда ўйнаётганимизда футболимиз даражасини кўрсатиб беришимиз керак. Бугун буни амалда исботладик. Футболимиз даражаси ёмон эмас. Рақибимиз Қатар ёки бошқаси бўладими, ишончли ҳаракат қилишимиз керак. Руҳий тайёргарлик жойида бўлиши керак деб бежизга айтмагандим. 3:1 ҳисобидаги ишончли ғалаба туфайли халққа байрам улашдик. Бугун негатив саволларни камроқ ўйлагандим. Бугун хурсандчилик қилайлик, қолган ҳаммасини тўғрилаймиз.

- Шуҳрат Муҳаммадиевни захирага олиниши мажбурий бўлдими ёки...

- Мажбурий бўлди. Шуҳратни тажрибаси бор ва ўз вазифасини яхши бажариб турганди. Эътибор берган бўлсанглар, узоқ масофага югурганида бироз оқсагани учун танаффус пайтида ёрдам бера олмаслигини айтди ва мажбурий ўзгариш қилдик.

- Баҳром Абдураҳимов асосий таркибда кўринмади...

- Ўртада кўп ўйинчиларимиз борлиги учун ротация қилиб турибмиз. Акмал, Марко, Жавоҳир, Баҳром, Жаба бу позицияларда ўйнаши мумкин. Шунинг учун ўрта чизиқдаги футболчилар бўйича ротацияга қўл уряпмиз. Балки ўша жойларда муаммоимиз камроқдир. Ҳужум чизиғимизда яна бир ўйинчимиз ёки Алибек Давронов бўлганида орқа чизиқларни ҳам ротация қилиб, ҳар бир учрашувга кучимизни тежаган бўлардик.

- “Шаржа”нинг ҳимоявий ўйинидан чўчимайсизми?

- Биз “Ал Садд” билан уларнинг ўйинини кўрганимизда албатта эътибор қилдик. “Шаржа” “Ал Садд” билан сафарда ўйнашига қарамасдан фақат ҳимояга ётиб олмади. Ҳужумга ҳам эътибор қаратишди. Ўша учрашув бежизга 0:0 бўлмади. Тенг курашлар остидаги учрашув бўлди. “Шаржа”га ҳам бошқасига ҳам жиддий ёндашамиз ва максимал ҳаракат қиламиз.