Рўзиқул Бердиев: "Тўпни назорат қилишни бошлаганимиздан кейин рақиб тўхтади"

Бугун воҳа дербисида “Насаф” Муборакда “Машъал”ни ягона гол эвазига мағлубиятга учратди. Учрашувдан сўнг, “Насаф” бош мураббийи Рўзиқул Бердиев журналистларнинг саволларига жавоб қайтарди.

- Ўйин тезликда бўлмади. Бунга бир нечта сабаблар бор. Жамоалар соат 15:00 да ўйин ўтказмайди. Балки шунинг учун қийинчиликлар бўлгандир. Асосан тўпни назорат қилдик ва битта тўп фарқини учрашув охиригача сақлаб қолдик. Биринчи бўлимда “Машъал” жамоаси 10 дақиқача ўйинни яхши бошлади. Тўпни назорат қилишни бошлаганимиздан кейин улар тўхтади. Биринчи бўлимда тўпни назорат қилиб позицион ҳужумлар уюштирган бўлсак, иккинчи бўлимда кўпроқ қарши ҳужумларда ўйнадик. Бунинг асосий сабаби ҳисобни сақлаб қолишимиз эди, буни уддасидан чиқдик. Рақибга деярли вазиятлар яратиш учун имконият бермадик.

- Ўтган турда “Насаф” “Бунёдкор” дарвозасига бешта гол урди. Бугун сафарда кичик 1:0 ҳисобида ютди. “Машъал”ни “Бунёдкор”дан кучлироқ деб ҳисоблайсизми?

- Бу – футбол. Тушунинглар, биз ҳар ўйинда 5-6 тадан гол урадиган жамоа эмасмиз. Қаердадир пасайиш бўлади, жамоалар ҳар хил ўйин кўрсатади. “Бунёдкор” ҳужумкор ўйин кўрсатса, “Машъал” кўпроқ ҳимоядан ўйнайди. Бу савол ўринсиз бўлди. Ҳамма жамоа яхши имкониятга эга. Ҳеч бир клубни ҳар сафар бештадан гол уриб ютишга қурби етмайди.

- Муборакдаги баҳсда сизни нима қониқтирмади?

- Ҳозир айтиб ўтдим, соат 15:00 да ўйнаш барибир фарқ қилди. Асосан ўйинларимизни кечки пайт 18:00 дан кейин салқинда ўтказардик. Майдоннинг ҳолати ҳам бизникидан фарқ қилади. Балки шу боисдан бугун тезкор ўйин бўлмади. Ўйинда бир қатор техник хатоларга йўл қўйдик. Тўпни назоратида камчиликлар қилдик. Шунинг учун ёрқин ўйнай олмагандирмиз.

- Акмал Мозговойнинг яқин масофадан гол ура олмаганига муносабатингиз қандай?

- Ундан олдин Ҳусайн Норчаев ҳам бирга-бир вазиятга чиққанди. Боя айтдим, иккинчи бўлимда қарши ҳужумда ўйнадик. Имкониятлар яратдик, фақат голга айлантира олмадик. Акмал ҳужумчи эмас, балки шу боис унга совуққонлик етишмагандир.

- Ғолиб Ғайбуллаев деярли асосий таркибда майдонга туширилмаятпи. Бугун ҳам уни кеч ўйинга қўшдингиз. У машғулотларда кўнглингиздагидек ҳаракат қилмаяптими?

- Ғолиб уч ҳафта олдин белидан жароҳат олиб, машғулотларни ўтказиб юборди. Шу сабабдан охирги ўйинларимизда кам қатнашяпти. Ҳали тўлиқ ўйин амалиётига эга эмас. Кўрган бўлсанглар, иккинчи бўлимда учта марказий ҳимоячига ўтдик. Ғайбуллаев майдонга тушиб вазифасини ёмон бажармади.

- “Насаф”нинг халқаро майдондаги имкониятлари сизни қониқтирадими?

- Албатта, асосийси натижага эришяпмиз, кейинги босқичларга чиқяпмиз. Бизни қанчалик масъулиятли ўйинлар кутаётганини ҳис қилиб турибмиз. ОФК Кубогида ғолиб чиқиб, мухлисларимизни хурсанд қилишга бор кучимизни сарфлаймиз.

- Норчаев бошидан жароҳат олгандек кўринди...

- Ўша вазиятда боши билан тўқнашиб кетди. Тўғриси, иккинчи бўлимда уни алмаштирмоқчи эдим. Лекин ўйнай олишини айтгани учун иккинчи бўлимда ҳам имконият бердим. Қайсидир маънода, охирги ўйинлардагидек бугун сермаҳсуллиги бўлмади. Битта вазият бўлди, ўшани ҳам голга айлантира олмади. Лекин унга ишонишда давом этамиз. Терма жамоага ҳам жалб қилинди. Майдонда катта ҳажмда ишлайди. Фақат ҳужум қилиш эмас, ҳимояга ёрдам беради, прессингларда ҳам яхши қатнашади. Ундан хурсандмиз. Тактик тарафдан ҳам ўсишга эришяпти.