Салоҳга қайси клублар қизиқиш билдирмоқда?

"Ливерпуль" таркибини тарк этган собиқ ҳужумчи Мухаммад Салох 2026 йилги жаҳон чемпионатидан сўнг қаерда фаолиятини давом эттиришни ҳал қилмоқда. TEAMtalk ёзишича, футболчи Саудия Арабистони чемпионати ва АҚШнинг MLS лигаси ўртасида танлов қилаяпти.

34 ёшли мисрлик юлдуз эркин агент мақомини қўлга киритди. У "Ливерпуль" билан яна бир мавсумга мўлжалланган шартномани муддатидан олдин бекор қилиш бўйича келишиб олган.

Миср терма жамоаси жаҳон чемпионатида Аргентинага ютқазиб мусобақани тарк этгач, Салох ўз келажаги борасидаги музокараларни фаоллаштирди. Ҳозирча энг асосий йўналиш сифатида Саудия Арабистони чемпионати кўрилмоқда, бироқ MLS'га йўл олиш варианти ҳам кун тартибидан тушгани йўқ.

Футболчининг қарор қабул қилишида географик омил катта аҳамият касб этмоқда. Салох Мисрга яқинроқ жойлашган, Саудия Арабистонининг ғарбий қисмидаги жамоаларга кўпроқ мойиллик билдирмоқда. Энг эҳтимолий клублар сифатида Жидда шаҳрининг "Ал-Иттиҳод" ва "Ал-Аҳли" жамоалари, шунингдек, амбицияси баланд "Неом" клуби тилга олинмоқда.

Шу билан бирга, Миср юлдузига АҚШ клублари — "Интер Майами" ва "Сан-Диего" ҳам жиддий қизиқиш билдирмоқда. Айниқса, "Сан-Диего" варианти эътиборга молик, чунки клуб эгаси — мисрлик миллиардер Мухаммад Мансур.

Европа жамоалари томонидан қизиқиш сақланаётганига қарамай, мутахассислар Салахнинг карьерасини Қитъа клубларидан бирида давом эттириш эҳтимолини жуда паст деб баҳоламоқда.