Самарқанддаги очилиш ўйинига тайёргарлик авжида. «Динамо» - «Насаф» учрашуви чипталари эса 10 минг сўмдан сотилмоқда

Яна икки кундан кейин Самарқандда Суперлига-2019 очилиш учрашуви “Динамо” – “Насаф” ўйини ўтказилади.

Бир неча кундан буён Самарқанд шаҳрининг турли чорраҳаларидаги 24 та йирик экранлар (Sity TV)да “Динамо” – “Насаф” ўйини афишаси намойиш этилмоқда. Қолаверса, учрашув анонси “Samarqand TV” орқали ҳам берилмоқда. Клуб сингари стадионда ҳам Суперлига баҳсига катта тайёргарлик ишлари олиб бормоқда.

Самарқандда 9 март, шанба кунги ўйинда ўйингоҳ мухлислар билан тўлиши кутилмоқда. Самарқанд ва Қашқадарё қўшни вилоятларнинг бош клублари ўртасидаги учрашув ҳозирдан мухлисларнинг катта қизиқишларига сабаб бўлмоқда. Шанба куни ўйиндан олдин соат 14:30дан бошлаб концерт ва кўргазмали дастурлар, расмий очилиш маросими ўтказиш режалаштирилган. Таниқли санъаткорлар куй-қўшиқлари билан мухлислар олдида чиқиш қилишади.

Бугундан бошлаб “Динамо” стадионида 1-тур доирасидаги “Динамо” – “Насаф” ўйини чипталари сотувга чиқди. Чипталар 10 минг сўмдан сотилмоқда.

Эслатиб ўтамиз, “Динамо” – “Насаф” учрашуви 9 март куни соат 16:00да бошланади.