Samvel Babayan: "Bunday temp futbolimiz rivojlanishiga to‘sqinlik qiladi"
O‘zbekiston Superligasi 18-turidan o‘rin olgan "So‘g‘diyona" - "Navbahor" uchrashuvidan so‘ng tashkil etilgan matbuot anjumanida namanganliklar bosh murabbiyi Samvel Babayan quyidagi fikrlarni bildirib o‘tdi:
"O‘yin kurashlarga boy tarzda o‘tdi. Albatta, biz bundan yaxshiroq natijani xohlagandik, ammo bunga erisha olmadik. Bugun ikki ochko yo‘qotdik. Afsuski, sof o‘yin vaqti bor-yo‘g‘i 30 daqiqa bo‘ldi xolos. Bu futbol va unda ayyorona taktikalar bor. Menimcha, bunday temp futbolimiz rivojlanishiga to‘sqinlik qiladi. Shogirdlarim g‘alaba qozonishni juda qattiq xohlagandi, ularga rahmat aytaman.
- "So‘g‘diyona" bilan kubok yarim finalida to‘qnash kelishingiz bugungi o‘yin uchun tanlangan taktikaga ta’sir ko‘rsatdimi?
Kubokdagi bellashuvgacha ancha vaqt bor. Bugungi taktika esa faqatgina shu bahs uchun tuzilgandi. Oktyabrdagi uchrashuvga alohida tayyorgarlik ko‘ramiz.
- Jasur Yaxshiboev 90 daqiqa o‘ynamayotganiga sabab uning jismoniy holati tayyor emasligidami?
Jasur yarim yil davomida deyarli o‘yin amaliyotisiz qolib ketdi. Uning ustiga, shaxsiy hayotida ham muammo yuzaga keldi. Shunga qaramay, bugun u maydonda o‘tkazgan daqiqalarida o‘zini maksimal ko‘rsatdi. Afsuski, u to‘liq o‘ynashga tayyor emas. Jasur so‘nggi turlarda o‘zining eng yaxshi o‘yinlarini ko‘rsatib, jamoamizga yordam berishiga ishonaman.
- Jamshid Boltaboev bugun maydonga tushganida, "Navbahor" markazni to‘liq egallab, g‘alaba qozonish imkoniyati osharmidi?
O‘yin oldidan Jamshidning tarkibdagi o‘rni va u etakchilarimizdan biri ekanligi haqida aytib o‘tgandim. Biroq bugun uning o‘rnida jamoa sardori harakat qildi va menimcha, Ahmedov ham ancha yaxshi o‘ynadi".
Fikrlar