Самвел Бабаян: "Ишонч билан айтаманки, 2026 йилги мавсум энг қизиқарлиси бўлади"

Хабарингиз бор, "Андижон" клуби ҳам Туркиянинг Анталия шаҳрида шуғулланмоқда.

Шу билан бирга ўртоқлик учрашувлари ҳам ташкил этилмоқда. Кеча Қозоғистоннинг "Каспий" клубига қарши ўтказилган ўртоқлик учрашувида рақиб жамоа 1:0 ҳисобида ғалаба қозонди.

"Андижон" устози Самвел Бабаян “Каспий” клубига қарши бўлиб ўтган ўртоқлик ўйинидан кейин мазкур беллашув ҳамда қуръа ҳақида клуб матбуот хизматига ўз фикрлари билан ўртоқлашди.

“Биз мавсумга тайёргарликни давом эттирмоқдамиз. Бу сафар “Каспий” жамоасига қарши ўйин жисмоний тикланиш ишларига бой бўлган тайёргарликнинг биринчи босқичини якунлаб берди. Ушбу учрашув футболчиларнинг функционал ҳолатини яхшилаш, ўйин шакли ва ўйин суръатини оширишга қаратилди. Тайёргарликнинг ушбу босқичида деярли барча футболчиларга бир хил ўйин вақти берилди. Чарчоқ шароитида ҳар бир футболчининг индивидуал сифатларини кўриш, уларнинг ўйин имкониятларини ҳамда биз таклиф қилаётган ўйин тактик моделига қўйилаётган талабларни қандай қабул қила олишини баҳолаш биз учун муҳим эди.

Қуръага келсак, умуман олганда, ким ва қачон рақиб бўлиб тўғри келиши катта аҳамиятга эга эмас. Қуръа ташлашнинг ўзи мавсум яқинлашаётганининг аниқ белгиси. Шунинг учун катта қизиқиш уйғотмоқда.

Ҳар бир жамоа 15 та уйда ва 15 та меҳмонда, жами 30 та ўйин ўтказади. Барча жамоаларнинг моддий-техник базаси сезиларли даражада ўсди. Ҳар бир жамоада сифатли футболчиларни таклиф қилиш имконияти мавжуд.

Ишонч билан айта оламан, 2026 йилги мавсум энг қизиқарлиси бўлади. Чунки кўплаб жамоалар ўз олдига юқори мақсадларни қўйган, осон ўйинлари бўлмайди”, - дея фикр билдирди Самвел Вячеславович.