Санжар Раҳмонов: "Флойд Мейвезер билан гаплашдим... Катта жангларнинг вақти келди"

Флойд Мэйвезернинг промоутерлик компанияси билан ҳамкорлик қилаётган  Санжар Раҳмонов (12-3-1, 6 КО) 28 февраль куни Кит Хантерга қарши реванш жангида очколар ҳисобига кўра ютқазганди.

Бу мағлубиятдан сўнг, Санжар билан Мэйвезер ҳамкорлиги тўхтатилиши, бунга сабаб эса, мағлубиятлар учтага етганлиги ҳақида гап тарқалди. Биз бу миш-мишларга ойдинлик киритиш учун  боксчи билан боғландик.

-  Ассалому алайкум. Бир нечта саволлар билан мурожаат қилмоқчи эдик?

-  Бемалол. Эътибор учун хурсанд бўлдим.

-  Тўғриси, Кит Хантерга қарши реваншда ғалаба қозонишингизга жуда ишонгандик?

-  Ўзим ҳам бунга шубҳа қилмагандим. Афсуски, мағлуб бўлдим.

-  Камчиликларингизни билиб олдингизми?

-  Албатта, мақсадим кучли зарба эвазига жангни эртароқ якунлаш эди. Қолаверса, менга қўрқув етишмади. Кам зарба бердим. Қисқа қилиб айтганда, режам иш бермади.

-  Хантер билан жанг кутилмаганда юзага келди. Демоқчиманки, унга қарши машғулотлар жараёни камлик қилмадими?

-  Тўғри, бир ҳафта қолганда ушбу жангни таклиф қилишди. Менга ёқди ва ўйлаб ўтирмай рози бўлдим. Ваҳоланки, 2 ой бошқа рақибга қарши тайёргарлик кўргандим. Унга нисбатан салоҳиятим юқорироқ эканлигини ўзим сезаман. Бироқ, боксда кичик тактик хато ҳам муваффақиятсизликка олиб келади.

-  Ҳали ҳам Дьюи Купер мураббийлиги остида машғулотлар олиб бораяпсизми?

-  Йўқ. У билан бирга эмасмиз. Охирги иккита жангимда Крис Бен-Тчавтчавадзе билан ишладим.

-  Демак, ушбу мағлубиятдан етарлича хулоса чиқардингиз?

-  Албатта. Бу мен учун яна бир тайёргарлик жараёнини ўтади. Тажриба бўлди. Хатолар устида янада кўпроқ ишлаш кераклигини англадим. Умуман олганда, бундан фожеа ясамай, яна олдинга интилишга ҳаракат қиляпман.

-  Жангдан кейин Флойд Мэйвезер билан гаплашдингизми?

-  Йўқ. Жангдан аввал гаплашган эдик.

-  Бу саволни беришимнинг боиси, Санжар билан Флойднинг ҳамкорлиги якунланди, қабилидаги гап-сўзлар, фикрлар янгради.

-  Ундай эмас. Аксинча, энди катта ва жиддий жангларда рингга кўтарилишим режалаштирилмоқда. Жамоам билан биргаман ва бу узоқ давом этишига ишонаман.  Шунингдек, ҳали муваффақиятларим олдинда ва жиддий натижалар қайд эта оламан. Бунга имкониятим етади. Бир-иккита мағлубиятлар, чемпион бўла олмайди, дегани эмас. Яратганни ўзи қўллаб турса, юртимизга чемпионлик камарларини олиб бораман. Ўйлайманки, яхши натижаларим орқали ватандошларимни хурсанд қиламан.

-  Бундай юксак ниятларингиз ижобат бўлишига тилакдошмиз!

-  Катта раҳмат!