Сардор Ла Лиганинг машҳур клубига ўтади

“Зенит” ҳужумчиси Сардор Азмун фаолиятини Испания Ла Лигасида давом эттириши мумкин. Бу ҳақда El Gol Digital нашри хабар тарқатмоқда.

Юқоридаги манбага кўра, 26 ёшли эронлик футболчини “Валенсия” ўз сафида кўришни хоҳламоқда. Аммо “кўршапалаклар” бунинг учун аввал Макси Лопес билан хайрлашиши керак. “Валенсия” уругвайлик футболчини 25 млн еврога сотишни режалаштирмоқда. Ундан тушадиган маблағ эвазига айнан Азмун сотиб олинади.

Азмун жорий мавсум “Зенит” сафида 27 та ўйинда майдонга тушди. У ушбу учрашувларда 16 та гол ҳамда 5 та голли узатмага муаллифлик қилди.

Transfermarkt портали Азмуннинг трансфер нархини 23 миллион еврога баҳоламоқда. Бундан аввалроқ, унга А Серия клубларидан қизиқиш борлиги ҳақида хабарлар тарқалган эди.