"Севилья" футболчисини муддатидан аввал ортга қайтариб юборишди

“Севилья” ярим ҳимоячиси Лукас Окампос яна ортга қайтадиган бўлди.

Клуб расмий сайтининг маълум қилишича, 28 ёшли аргентиналик футболчини мавсум охиригача ижарага олган “Аякс” уни муддатидан аввал ортга қайтаришга қарор қилди. Таъкидлаш керакки, Лукаснинг Амстердам клубидаги фаолияти бор-йўғи тўрт ярим ойни ташкил этди.

Эслатиб ўтамиз, Энтони жамоани тарк этгач, "Аякс" зудлик билан ўринбосарга муҳтож эди ва клуб Окампосни жорий мавсум охиригача сотиб олиш ҳуқуқи билан ижарага олди. Бироқ аргентиналик янги клубида муваффақиятга эриша олмади. Буни унинг статистикаси ҳам кўрсатиб турибди: 6 та ўйин, шундан 4 таси Нидерландия чемпионати ва 2 таси Чемпионлар лигаси.

Маълумот учун, Окампос 2019 йилдан бери "Севилья"да ўйнаб келмоқда.