Шахмат. Тошкентда ўтказилган жаҳон чемпионатида Ўзбекистон терма жамоаси 1-ўринни эгалади

Хабар берганимиздек, шу кунларда пойтахтимиз шахматнинг рапид ва блиц йўналишлари бўйича 9 ёшдан 17 ёшгача бўлган мактаб ўқувчилари ҳамда 20 ёшгача бўлган ўғил-қизлар ўртасида жаҳон чемпионатига мезбонлик қилди. Кеча “International Hotel Tashkent” меҳмонхонасида мусобақанинг ғолиб ва совриндорларини тантанали тақдирлар маросими бўлиб ўтди.

Қайд этиш лозимки, соврин жамғармаси 20 минг евро бўлган мазкур нуфузли мусобақада Озарбайжон, Беларусь, Хитой, Испания, Венгрия, Ҳиндистон, Эрон, Қозоғистон, Қирғизистон, Мўғулистон, Нигерия, Словения, Россия, Тожикистон, Туркманистон, БАА, АҚШ давлатларидан 300 нафарга яқин спортчи иштирок этди.

Ўзбекистон терма жамоаси якунда умумжамоа ҳисобида 1-ўринни эгаллади. Кейинги ўринлар Қозоғистон ҳамда FIDE номидан иштирок этган жамоага насиб этди. Таъкидлаш керакки, мусобақа давомида Муҳиддин Мадаминов, Муҳаммадзоҳид Суяров, Хумоюн Бекмуратов, Алмаз Раҳматуллаев, Асроржон Омонов, Афруза Ҳамдамова, Гулдона Каримова, Умида Омонова, Мафтуна Бобомуродова, Озода Шаҳзодова, Гулхумор Нажмиддинова, Моҳизода Мухсинова каби иқтидорли спортчиларимиз юртимиз шарафини муносиб ҳимоя қилди.

Қуйида ушбу тақдирлаш маросимидан олинган фотосуратларни томоша қилишингиз мумкин: