Шайхларнинг "Манчестер"и қандай қилиб, трансфер бозорида барчадан зўр ишламоқда?

"Сити"нинг трансферлари идеал, аммо... SPORTS.uz "Манчестер Сити" трансферлари ҳақидаги таҳлилий мақолани эътиборингизга ҳавола этади. Манчестерликларнинг молиявий имкониятлари ва "joru Football Money League Deloitte" берган маълумотларга суянадиган бўлсак, "шаҳарликлар" 2020/21 йилги мавсумда 644 миллион евро фойда олган ҳолда, дунёнинг энг сердаромад жамоасига айланди. Иккинчи ўриндаги "Реал" Мадридда бу кўрсаткич 640 миллион еврони ташкил этмоқда. Кучли учликни "Бавария" 611 миллион евролик натижа билан якунлади. Бу мавсумдаги трансферларга кўз югуртирсак, "шаҳарликлар" нафақат майдонда, балки унинг ташқарисида ҳам каттароқ марраларни забт этишга тайёр эканлиги кўзга ташланади.

АПЛ клублари молиявий фэйр-плей қоидасига амал қилиш илинжида ўз футболчиларидан катта қийинчилик билан қутилмоқда. Эътиборлиси, бу борада "Манчестер Сити"да ҳеч қандай муаммо йўқ. Жуда яхши йўлга қўйилган менежмент ва мураббийлар штабининг кўрсатмалари клубга яхшигина даромад олиб келмоқда. Мисол учун, "Манчестер Юнайтед" Роналдуга ҳафтасига 515 минг евро маош тўлаётган бир пайтда, "шаҳарликлар" 21 ёшли Эрлинг Холандни атиги 51 миллион еврога қўлга киритди. Норвегиялик вундеркинд бир неча йил ичида дунёнинг энг қиммат футболчисига айланиши аниқ. Роналду эса, вақт ўтгани сайин ўз трансфер қийматини йўқотиб боради. Биргина "Холанд операцияси" ўз йўлига. Бугунги трансфер бозорининг стабил эмаслиги боис, ўз вақтида қиммат активларни сотиб юбориш ҳам катта маҳорат талаб этади.

Жорий мавсум аввалидаги "Сити" амалга оширган иккита катта ишни кўриб чиқамиз. Раҳим Стерлинг "Челси"га 47,5 миллион фунт эвазига кўчиб ўтган бўлса, Габи Жезус учун "Арсенал" 45 миллион фунт тўлашга мажбур бўлди. Бир қарашда асосий футболчиларнинг кетишидан жамоа ютқазгандек кўриниши мумкин, лекин бугунги "Сити" учун улар энг яхши мавсумларини бериб бўлди. Иккиси ҳам Гвардиола тизимидаги оддий ижрочилар эди, холос. "Шаҳарликлар" трансфер бозорида уларнинг нархи тушиб кетмасидан олдин, вақтида пуллаб юборишга улгурди. Жезуснинг трансферидан 18 миллион соф фойда олинган бўлса, Стерлинг учун 2015 йилда "Ливерпуль"га тўланган пулларнинг ўрни қопланди. Асосий таркибда ўзи учун жой топа олмаган Зинченко ҳам "Сити"ни 32 миллион еврога "бойитиб кетди". Бу ҳали ҳеч нарса эмас! Асосий жамоада деярли кўриниш бермаган академия аъзолари ортидан ишланган 34 миллион еврога нима дейсиз? Ҳали бирор маротаба АПЛ ўйинларида тўп тепмаган Гевин Базун ва Ромеу Лавиа учун 29 миллион евро тўлаган "Саутгемптон" яхши юриш қилди. 1-2 йилда бу футболчиларга пуллари етмай қолишини ҳисобини олди, чоғи. Агар академия шу темпда ишлашда давом этса, "Сити" Британиядаги энг бадавлат клуб унвонини ҳеч кимга бериб қўймаса керак. Умумий ҳисобда жамоа бу мавсумда трансферлардан 167 миллион фунт фойда қилди. Бу уларнинг 2017/18 йилги мавсумда ўрнатган рекордидан (82 миллион фунт) икки баробар яхшироқ кўрсаткич!

"Қисман, кучли футболчиларнинг жамоани тарк этиши ёмон. Шунга қарамай, топ клублар нафақат катта трансферларни амалга ошириши, балки ўз футболчиларини ҳам яхшигина суммага сотишни билиши керак. "Сити" фақат футболчи сотиб оладиган клуб эмас". Пепнинг сўзларида жон бор. Айниқса, Погба, Матич, Лингард сингари ижрочиларни ёмон менежмент сабабли текинга қўйиб юборган "Манчестер Юнайтед" фонида бу яққол кўзга ташланади. Барча "шаҳарликлар"ни катта трансферларда айблаётган бир пайтда, қизиқ бир фактга эътибор қаратинг! "Қизил иблислар" 2012/13 йилдан ҳозирга қадар янги футболчилар учун 1,492 миллиард евро сарфлади. Футболчиларни сотиш ортидан келган даромад 439 миллион фунт холос. Ҳозир, "Манчестер Сити" нафақатг гранд клуб, балки молиявий бақувват компанияга ҳам айланиб бормоқда. Тўғри, йўлга қўйилган иш сабабли манчестерликлар секин-аста топ жамоалар қаторидан ўрин олди. Энди уларнинг етакчиси бўлиш арафасида ҳам турибди. Улар шу темпда давом этса, яқин 10 йил ичида Европанинг бошқа гранд клубларидан ҳам ўтиб кетиши аниқ.

Яҳёхўжа Улуғхўжаев