Шомуродов ҳаммасини ўзгартириб юбориши керак эди...

“Специя” А Сериянинг 30-турида ўз мухлислари кўз ўнгида мусобақа жадвалида иккинчи ўринда бораётган “Лацио” билан куч синашади. Юқори дивизионда жон сақлаб қолиш учун курашаётган лигурияликлар учун ҳар бир очко ўта муҳим. Шу боис, римликларга қарши беллашув ҳам катта аҳамиятга эга.

“Специя” бош мураббийи Леонардо Семпличи бўлажак ўйин олдидан фикр-мулоҳазаларини билдириб, Элдор Шомуродов ҳақида ҳам тўхталиб ўтди.

Ўйин ҳақида

Биз футболчилар билан “Салернитана” ва “Фиорентина”га қарши кечган аввалги икки ўйин ҳақида гаплашдик. “Лацио”га қарши баҳсда ҳам худди ана шундай шиддатли ўйин кутаман. Бунақа жамоалар билан тўқнаш келганда анча тер тўкишга тўғри келади. Лекин футболчилар менинг ғояларимни майдонда намойиш эта олаётганидан, салоҳиятимизни амалда кўрсатаётганидан  хурсандман.

Менга курашувчан жамоани кўриш ҳузур бағишлайди. Бу катта мақсад сари интилаётган жамоа учун муҳим хусусият. Ўзимизга бўлган ишонч бўлажак баҳсда ҳам бизга қўл келиши керак.

Таркибдаги муаммолар ҳақида

Ҳамон бир неча футболчиларимиз хизматидан тўлиқ фойдалана олмаймиз. Шимон Журковски ва Кевин Агудело машғулотларга қўшилди. Виктор Коваленко ҳам шуғулланди, лекин тайёргарлиги юқори даражада эмас. Аркадиуш Реца ҳам бир ҳафтадан бери формасини тиклашга уринмоқда. Хольм учун мавсум тугаган. Маттиа Кальдара ва Даниэль Мальдинида ҳам айрим муаммолар бор.

Мен қўл остимда бўлган ва учрашувда қатнашишга тайёрлар ҳақида гапиришни маъқул кўраман. Чунки “Лацио” га қарши баҳсда айнан уларни ўйнатаман. Мен шиддатли ўйин тарафдориман. Рақибимиз ўта кучли, биз эса уларга муаммо туғдиришга тайёрмиз. Рақибни ҳурмат қиламиз, лекин майдонда нималарга қодирлигимизни кўрсатишимиз шарт.

Шомуродов ҳақида

"Фиорентина"га қарши ўтган ўйинда Элдор Шомуродов биргина зарба билан мусобақа жадвалидаги барча вазиятни ўзгартириб юбориши мумкин эди. Лекин ўзбек футболчиси хатога йўл қўйди.

Элдор бир ҳафта давомида бой берилган имкониятни унутиш учун жуда қаттиқ меҳнат қилди.Энг муҳими, бутун жамоа ва клуб ходимлари бундай хато ҳаммада ҳам учраши мумкин эканини тўғри тушунди. Биз ҳам Элдорнинг ёнида турдик.

У хато қилди, лекин узр сўради.Энди фақат олдинга интилишимиз керак. Олдинда Шомуродов фаолиятида яна ҳал қилувчи вазиятлар, албатта, юзага келади.

Элдор, одатдагидек, машғулотларда жуда яхши шуғулланди. Бу жуда муҳим жиҳат. Жамоадаги бошқа футболчилар ҳам Шомуродовнинг ўтган ўйин охирида юз берган ёқимсиз ҳолатни эсга олишига йўл қўймади.

“Лацио” ҳақида

“Лацио” зўр формада. Биз билан бўладиган ўйинга “Ювентус”ни ютиб келишди. Бу жамоанинг нозик нуқталарини топиш жуда қийин. Бош мураббий Маурицио Сарри римлик футболчиларга ўз ғояларини ва менталитетини тўлиқ сингдириб бўлган.

“Лацио”нинг ҳимоя чизиғи лигада энг кучлилардан. Рақиб қудратли эканига қарамасдан, ўйинда уларни жазолаш учун вазиятлар бўлади. Натижага эришиш учун тўп назоратини ўзимизда ушлаб туришимиз, “Лацио”нинг ҳаракатларини чеклаб қўйишимиз керак. Бу ижобий натижага эришишда муҳим омил.

“Специя” ва “Лацио” ўртасидаги учрашув 13 апрель куни Тошкент вақти билан 23:45 да бошланади.

Сalciomercato.com: Шомуродов яна қаҳрамон бўлиши мумкин эди...