Шомуродов: Янги формам ярашибдими? (фото)

“Рома” янги мавсум учинчи формасини тақдим қилди. Одатда, римлик “бўрилар” оқ, қизил ва сариқ ранглар ишлатилган спорт кийимдан фойдаланар эди.

Бу галги футболкаларда қора ва пушти ранг ишлатилган.

“Рома”даги легионеримиз Элдор Шомуродов ҳам янги копмлект формага эга бўлди ва уни кийиб кўрди.

“Рома” футболчилари бугун Европа лигаси гуруҳ босқичининг иккинчи турида Финляндиянинг Хик жамоасига қарши ўтказиладиган беллашувни айнан янги формада бошлаши кутилмоқда.

Эслатиб ўтамиз, Жозе Моуриньо шогирдлари УЕФА мусобақалари таснифига кирувчи ушбу турнирни мағлубият билан бошлади. Европа лигаси ғолиблигига асосий даъвогарлардан ҳисобланган “Рома” Болгариядаги илк учрашувда “Лудогорец” жамоасидан 1:2 ҳисобида мағлуб бўлди.

Ўша учрашувда римликларнинг ягона голини захирадан майдонга тушган Элдор Шомуродов киритди ва кўплаб мутахассислар, оммавий ахборот воситалари ва мухлислар томонидан беллашувда қатнашган “Рома” футболчилари орасида энг яхшиси,  деб топилди.

Европа лигасидаги гол Шомуродовнинг ўзи учун ҳам тарихий аҳамият касб этди. Ҳамюртимиз клублар миқёсида ўзи иштирок этган барча нуфузли турнирларда ўз номига гол ёздириб қўйишга эришди.

Профессионал футболчилик фаолияти давомида “Машъал” ва “Бунёдкор”, “Ростов”, “Женов” ҳамда “Рома” клублари шарафини ҳимоя қилган ҳужумчимиз Ўзбекистон Суперлига, Россия премьер-лигаси ва кубоги, Италия А Серияси ва кубоги, халқаро миқёсда Осиё Чемпионлар лигаси, УЕФА Конференуиялар лигаси, Европа лигаси каби мусобақаларда рақиблар дарвозасини ишғол қилишга муваффақ бўлди.

Элдор умумий ҳисобда ўзи ўйнаган клублари учун 223 маротаба майдонга тушиб, 46 та гол ва 23 та ассист қайд этган.

Бундан ташқари, Ўзбекистон миллий терма жамоасида 56 та беллашувда қатнашиб, ўз ҳисобига ўттизта гол ёздириб қўйган.

Элдор Шомуродов жамоаси Европа лигасида бугун муҳим учрашув ўтказади. Шомуродовнинг бошланғич таркибда майдонга тушиши мавҳум. Лекин кўпчилик ўзбек ҳужумчиси Финляндиянинг ХИК жамоасига қарши учрашувда захирадан ўйинга қўшилишини кутмоқда.

“Олимпико” стадиони мезбонлик қиладиган “Рома” ва ХИК баҳси Тошкент вақти билан ярим тунда – 00:00 да бошланади.