Шомуродовга мухлислик қилган боланинг орзуси ушалди

Ростовлик 15 ёшли мактаб ўқувчиси Николай Трифоменко илк бор ўзи мухлислик қиладиган “Ростов” жамоасининг ўйинини бевосита стадиондан томоша қилишга муваффақ бўлди.

Кўп болали оила фарзанди бўлган Николай спортга қизиқади. Шунинг учун  у таҳсил оладиган мактаб директори вилоят раҳариятига болани рағбатлантиришни сўраб, мурожаат қилганди.

Яқинда қишлоқ мактаби ўқувчиси орзуси рўёбини кўрди. Уни устози билан бирга “Ростов” – “Зенит” учрашувини томоша қилиш учун “Ростов-Арена”га таклиф қилишди.  

- Биз ўйинни VIP-зонадан томоша қилдик. Ҳаммаси ажойиб бўлди. Энг муҳими, Колянинг орзуси ушалди, - деди мактаб директори Роман Корчаков.

- Элдор Шомуродов ва Хорен Байрамян – менинг “Ростов”даги кумирларим. Уларнинг ўйинини катта қизиқиш билан томоша қилдим. Афсуски, ютқазиб қўйдик. Лекин ўйиннинг ўзи роса ёқди. “Ростов-Арена” зўр стадион экан. Ҳаммага айтяпман – орзуим амалга ошди, - деди Коля.