Шомуродовни “қўйиб” юборишмади!

Туркия чемпионатининг 12-тури якунларига кўра, Суперлиганинг тўпурарлари пойгасида жиддий ўзгаришлар рўй бермади. Бу турни “Генчлербиргили” ва “Истанбул Башакшеҳир” ўртасидаги учрашув бошлаб берганди.

Кескин ва муросасиз курашлар остида ўтган учрашувда Элдор Шомуродов навбатдаги голини киритишга муваффақ бўлди. Бироқ жамоаси сафардан 1:2 ҳисобида мағлубият билан қайтди.

“Истанбул Башакшеҳир” ҳозирги ҳолати билан Суперлигада юқори ўринлар учун курашиши бироз қийиндек туюлмоқда. Лекин клуб мухлислари тўпурарлар пойгасини алоҳида қизиқиш билан кузатиб бораётгани бор гап.

“Башакшеҳир” чемпионатнинг кам гол ураётган жамоаларидан бири ҳисобланади. Аммо бу ҳолат ўзбек ҳужумчисининг тўпурарлар баҳсида етакчи ролларда боришига тўсқинлик қилаётгани йўқ. Элдор жамоасининг 13 та голидан 8 тасининг муаллифидир.

Эътиборли жиҳати, Элдор Шомуродов 12-турдан кейин голли учрашувлар сериясини учтага етказиб олди. Бу галги аниқ зарба легионеримизни саккизта гол билан тўпурарлар пойгасида биринчи ўринга олиб чиққан эди.

Аммо Англияда маҳорат оширган, “Саутгемптон”дан келиб “Трабзонспор” шарафини ҳимоя қилаётган Пол Онуачу ўзбек футболчисини яккапешқадамликка қўйиб юбормади. Нигериялик форвард “Аланьяспор” дарвозасини ишғол қилиб, голлари сонини 8 тага етказди ва Шомуродов билан тенглашиб олди.

Фарқи жиҳати шундаки, Элдор саккизта голдан еттитасини ўйиндан, биттасини пенальтидан киритган. Онуачу эса, икки бор 11 метрдан гол урган. Бу турга келиб, чемпионат “Олтин бутса” учун кураш асосан мана шу иккита ҳужумчи ўртасида кечиши ойдинлашиб қолди.

“Олтин бутса” рейтингининг кейинги поғоналарида жойлашган аксарият ўйинчилар ҳам Европанинг кучли лигаларида тажриба тўплаган чарм тўп усталаридир. Хусусан, олтитадан гол урган юлдузлардан аргентиналик Мауро Икарди илгари “Сампдория”, “Интер” ва “Пари Сен-Жермен”да, марокашлик Юссуф Эн-Несири Испания чемпионатининг “Леганес”, “Малага” ва “Севилья” каби жамоаларида ўйнаган. Улар қаторига маҳаллий тўпурар – “Коньяспор” форварди Умут Найир ҳам қўшилди. Фаолиятининг катта қисмини Туркия клубларда ўтказаётган 32 ёшли ҳужумчи орада бир йил Хорватия чемпионатига бориб, “Хайдук” клуби шарафини ҳимоя қилиб келганини инобатга олмаса, асосан турк лигасига тўлиқ мослашганлиги учун бошқа тўпурарлардан ажратиб турибди.

12-турда Шомуродов ва Онуачуни таъқиб қилаётган тўпурарлар  бу ўйинчиларнинг бирортаси рақиб дарвозасига йўл топа олмади.

Аммо чемпионат тўпурарлари баҳсининг учинчи гуруҳида бештадан тўп киритган ўйинчилар сафи кенгайди.  “Самсунспор”дан Карло Холсе, “Трабзонспор”дан Фелипе Аугусто, “Бешиктош”дан Рафа Силва ҳамда “Фенербаҳче”дан Талиска бу турда ўз ҳисобига гол ёздириб қўёлмади. Уларнинг сафига голлари сонини бештага етказган Жуан (“Гёзтепе”), Тэмми Абрахам (“Бешиктон”), Герман Онугха (“Кайсериспор”) қўшилди.

Эслатиб ўтамиз, мавсум бошида “Рома”дан “Истанбул Башакшеҳир”га ижара шартномаси асосида кўчиб ўтган Элдор Шомуродов Суперлига доирасида “Бешиктош”, “Аланьяспор”, “Коньяспор”, “Галатасарой”, “Кожаэлиспор” ва “Генчлербирлиги” дарвозаларига биттадан гол урган бўлса, “Антальяспор” майдонида ўтказилган баҳсдан дубль билан қайтган.

“Истанбул Башакшеҳир” Туркия Суперлигасининг навбатдаги турида “Трабзонспор”ни қабул қилади. 23 ноябрда бўладиган бу баҳсда тўпурарлар пойгасининг икки етакчиси – Элдор Шомуродов ва Пол Онуачу ўзаро тўқнаш келади.

Яна қанча гол керак? Шомуродов энди ҳақиқий тўпурарлигини исботлаяпти...

Ўзбек футболчилари мағлубиятига Осиёдан қандай муносабат бўлди?

Ўзбек футболчиси жаҳон чемпионати “Олтин бутса”сига даъвогар!

Ўзбекистоннинг жаҳон чемпионатидаги ғалабасига қандай муносабат бўлди?