Шов-шувли UFC 249 турнири ҳақида ёхуд асосий жанг ғолибларининг навбатдаги рақиблари ким бўлади?

ММА оламидаги энг катта тортишувларга сабаб бўлган UFC 249 турнири 9 майга (Тошкент вақти билан 10 май) режалаштирилди. Мазкур санага ҳам бир ҳафта вақт қолди. Бутун дунё бўйлаб, коронавирус пандемияси ҳукм сураётганлиги сабабли, яна бу турнир қолдирилмаса эди, деган ҳадик ҳам йўқ эмас. Чунки бу жанг кечаси билан боғлиқ воқейликлардан хабарингиз бор. Лекин мазкур жанг оқшомининг карди жуда ажойиб кўриниш олган, деб бемалол айта оламиз. Бунақаса камдан-кам бўлади. Бир-бирига мос ва хос рақиблар танланган. Иккита титул жанги, андеркардлардаги тўқнашувлар ҳам жуда қизиқ бўлиши турган гап. Дана Уайтдан навбатдаги ажойиб юриш...

Биз бироз ушбу турнирдаги тўқнашувлар мақоми, жангдан кейинги имкониятлар ҳақида сўз юритмоқчимиз.

Турнирнинг марказий жанги енгил вазн тоифасидаги Тони Фергюсон ҳамда Жастин Гэтжи ўртасида бўлиши барчага маълум. Бу баҳс ғолибини Хабиб Нурмагомедов кутиб турганидан ҳам бохабарсиз. Шунинг учун, қолган бир нечта жангларга эътибор қаратамиз.

Генри Сехудо (15-2-0)  – Доминик Круз (22-2-0)

Иккинчи марказий жангда ўта енгил вазн тоифаси чемпиони Генри Сехудо тажрибали Доминик Крузга қарши октагонга кўтарилади. Ўртага чемпионлик камари тикилган. Круз фаолияти мобайнида рақибига нисбатан 7 маротаба кўп жанг ўтказган. Лекин Сехудо UFC промоушенида Доминикдан кўра, октагонга 5 марта кўпроқ кўтарилган. Уларнинг фаолиятида иккитадан мағлубият бор. Ҳар иккиси Т.Ж. Диллашоу ва Деметриус Жонсон каби UFC юлдузларини мағлубиятга учратиб, ўзлари супер юлдузга айланишган. Доминик Круз 2016 йил UFC 207 турнирида Годи Гарбрандтга имкониятни бой бериб қўйганди.  Бунга қадар, у 2007 йил Лас-Вегасда бўлиб ўтган WEC 26 турнирида Юрайя Фейбердан ҳам мағлубиятни қабул қилиб олган. Унинг Гарбрандт билан жангидан сўнг, фаолиятида танаффус юзага келганди. Қайтиш эса чемпионлик жангига тўғри келмоқда. Бир сўз билан айтганда, бир-бирига ҳар жабҳада мос рақиблар. Сехудо эса, UFC 197 ҳамда UFC The Ultimate Fighter 24 да кетма-кет Деметриус Жонсон ва Жозеф Бенавидесдан мағлубиятга учрайди. Шундан сўнг, унинг фаолиятида юксалиш бўлиб, қаторасига 5 маротаба ғалабага эришади. Улар орасида Жонсонга қарши реванш жанги ҳам ўрин олганди. Хуллас, мазкур жанг ғолибини кейинги рақиби ким бўлиши мумкин? Шубҳасиз, Петр Ян ва Марлон Мораеш жангида ким зафар қучса, ўша бўлади.

круз

Фрэнсис Нганну (14-3-0) –Жаирзиньо Розенстрайк (10-0-0)

 Бу жанг мухлисларнинг эътибори ва қизиқиши нуқтаи назардан, юқоридаги икки жангдан ҳеч бир жабҳада қолишмайди. Одатда, оғир вазн тоифасида жанглар ҳар доим ММА ихлосмандларининг диққат эътиборида бўлиб келган. Бу тўқнашув эса, янада кўпроқ қизиқиш уйғотиш мумкин. Чунки, икки даҳшатли зарба соҳиби бир-бирига рўбарў келади. Камерунда таваллуд топиб, кейинчалик Франция фуқаросига айланган Фрэнсиснинг фаолиятида учта мағлубият бор бўлса-да, унинг салоҳияти жуда юқори. У билан очиқ жангга киришиш шунчаки аҳмоқлик бўлади. Суринамлик Жаирзиньо ҳам худди шундай типдаги жангчи ҳисобланади. У мағлубиятсиз сериясини давом эттирмоқда. Мазкур жангда Суринам вакилининг ҳақиқий кучига баҳо бериш мумкин бўлади. Чунки у эндигина UFC да 4 та жанг ўтказди ва рақиблари у қадар жиддий эмас эди. Тўғри собиқ чемпион Андрей Арловский ҳамда Алистар Овереем ўз вақтида жуда кучли бўлишган.

Лекин Жаирзиньо билан бир йил аввал тўқнаш келишди ва бу муддат уларнинг эпопеяси якунланаётган вақтлари эди. Нганну эса, Миочич билан ажойиб жанг олиб борди. Кейн Веласкесни нокаутга учратди. Жуниор Дос Сантос ҳамда Куртис Блейдсни мағлубиятга учрата олди. Шу жиҳатдан тажриба бироз Нганну тарафида... Қолаверса, у UFC промоушенида 11 та жанг ўтказишга улгурди. Франциялик жангчи фаолиятини бошланиш вақтида Зумана Сисседан мағлубиятни қабул қилиб олганди. UFC да эса, икки бор муваффақиятсизликка учради. Амалдаги чемпион Стипе Миочич ақлли жанг услуби билан унга имконият қолдирмаган бўлса, Деррик Льюисга кутилмаганда имкониятни бой бериб қўйди. Қисқаси икки африкалик ўртасида даҳшатли жангга гувоҳ бўламиз. Бу тўқнашувда катта эҳтимол билан нокаут ёки техник нокаут қайд этилса керак. Албатта, бу бизнинг шахсий фикримиз! Ушбу қарама-қаршилик ғолиби қандай имкониятларни қўлга киритиши мумкин? Албатта, чемпионлик учун даъвогарга айланади. Яъни Миочич ва Кормье ўртасидаги учинчи жанг ғолибига қарши октагонга кўтарилади.

нганну

Қолган жангларда, жумладан Грег Харди – Йорган де Кастро ҳамда Нико Прайс ва Висенте Льюке жуфтлигида Харди ва Прайс ғалаба қозонадиган бўлса, улар навбатдаги жангида топ 5 таликдан ўрин олганлар билан октагонга кўтарилиш эҳтимоли юқори. Қолган тўқнашувлар эса, шунчаки кардни тўлдириш учун десак муболаға бўлмайди. Мисол учун, Серроне – Петтис, Вердум–Олейник жуфтликларини шундай мақомдаги баҳслар деб айтишимиз мумкин. Шундай бўлса-да, бу жанглар ҳам ажойиб ўтишига ишончимиз комил. Натижалар қандай бўлишини тез орада билиб оламиз. 

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Alibek Narmamatov
04/05/2020 03:33
Surinam Afrikada joylashmagan. Sal e'tiborliroq bölinglar.