Шу иккаласига қўшиб, Роналдуни йўқотинг!

“Манчестер Юнайтед”нинг собиқ ҳимоячиси Патрис Эвра клуб раҳбарияти жамоанинг ўйини ўнгланиши учун уч нафар етакчи футболчидан воз кечиш кераклигини таъкидламоқда.

- Ростгўй бўлайлик. Одамлар Магуайрга бироз қаттиқ муносабат қилишяпти. Бу унинг қиммат нархга олингани билан боғлиқ. Мухлислар нархга қараб баҳолайди. Иш шу даражага етдики, Ҳарри яхши ўйнаса ҳам буни ҳеч ким инобатга олмаяпти.

Чап қанот ҳимоячиси ҳақида гапирганда эҳтиёт бўламан. Чунки шу позицияда тўп тепганман. Люк Шоу узоқ вақтлардан бери ўйнаяпти. Лекин у Деннис Ирвин ёки менинг даражамга етгани йўқ. Чап қанот ҳимоячиси “Юнайтед”да жуда муҳим ҳисобланади.

Криштиану Роналду масаласи бироз бошқача. У қоладими ёки кетадими? Бу савол мухлисларни қийнаяпти. Ҳали у жамоада, трансфер ойнаси очиқ. Мен Криштиануни шахсан таниган инсон сифатида шуни айтаманки, у ўйнай олмаса, кетадиган футболчи ҳисобланади.

Шундай экан уларнинг барига рухсат бериш керак, - деди Патрис Эвра.