Shuhrat Maqsudov: "Bugun "klass" sezilib turdi"

O‘zbekiston Coca Cola Kubogi yarim final bosqichidan o‘rin olgan “Paxtakor” – “Bunyodkor” uchrashuvidan so‘ng mehmonlar bosh murabbiyi Shuhrat Maqsudov o‘z fikrlari bilan o‘rtoqlashdi.

- Futbolchilarimga e’tiroz yo‘q. Hozir kiyim almashtirish xonasida yigitlarga o‘yin uchun minnatdorchilik bildirdim va ularni ruhlantirdim. “Paxtakor” kuchli jamoa, tarkibida terma jamoaga nomzod o‘yinchilar bor, bugun “klass” sezilib turdi. Hozir meni tinchlantirayotgan holat shuki, biz chempion jamoaga yutqazdik. Aytganimdek, futbolchilarim yaxshi harakat qilishdi. Penaltilar seriyasi bu - lotoreya. Ushbu lotoreyada biz yutqazdik. “Paxtakor”ni final yo‘llanmasini bilan tabriklayman!

Hakamlar haqida mavsum davomida umuman gapirmadim. Shuning uchun bu an’anamga sodiq qolaman. Ularni nazorat qiluvchi qo‘mita bor. Agar fikrim juda kerak bo‘lsa aytaman: bugungi o‘yindagi hakamlik uchun e’tirozim yo‘q. Akobirxo‘ja Shukurillaev yaxshi inson va unga omad tilayman!

“Bunyodkor” matbuot xizmati.