“Сити” Ҳусанов ўйнаган позицияга қимматбаҳо юлдузни олади

“Манчестер Сити” раҳбарияти ёзги трансферлар ойнаси даврида “Ньюкасл Юнайтед”нинг ўнг қанот ҳимоячиси Валентино Ливраменто трансферини амалга оширишни режалаштирмоқда.

Бу ҳақда Talksport нашри хабар бермоқда.

Нашр маълумотига кўра, “шаҳарликлар” 23 ёшли ҳимоячини бир неча ойдан бери кузатиб келмоқда ва агар у жамоага ўтса, Манчестер клубида ўнг қанот ҳимоячиси позициясини узоқ муддатга мустаҳкамлаб беради, деб умид қилмоқда.

Таъкидлаш жоизки, мавсум давомида “Манчестер Сити” ҳимояси ўнг қанотида бир неча футболчи алмашди. Бу позицияда Рико Льюис, Матеуш Нуньеш ва Абдуқодир Ҳусанов ўйнади.

Улар орасида бу позицияда Матеуш Нуньешнинг ўйини самаралироқ чиқди ва ҳозирча у асосий ўнг қанот ҳимоячиси ҳисобланади. Аслида марказий ҳимоячи ҳисобланган ўзбек футболчиси ҳам қанотда ишончли ўйнаши билан ажралиб туради. Бироқ яқинда Абдуқодир Ҳусановнинг ўзи ҳимоя марказида ўйнаш кўпроқ маъқул келишини айтганди.  

Шундай бўлса-да, бу учала футболчининг асосий амплуаси ўнг қанот ҳимоячиси эмас.

“Ньюкасл” мутасаддилари Валентино Ливраментога бир неча клублар, хусусан, “Манчестер Сити”дан жиддий қизиқиш бўлаётгани билади ва футболчи билан амалдаги шартномани узайтиришга ҳаракат қилмоқда.

Жорий мавсумда Ливраменто барча мусобақаларда 19 та ўйинда қатнашиб, ҳимоядаги вазифаларини уддалаш билан бир қаторда битта голли узатма амалга оширди.

Футболчининг клуб билан амалдаги меҳнат шартномаси 2028 йилнинг ёзигача мўлжалланган. Transfermarkt портали маълумотига кўра, Ливраментонинг трансфер бозоридаги қиймати 40 миллион еврони ташкил қилади.