“Сити” Холандни хурсанд қилди

“Манчестер Сити” раҳбарияти гол уриш бўйича рекордларни тинимсиз янгилаётган Эрлинг Холанднинг жамоада узоқ муддатга қолишини таъминламоқчи.

Яқинда “Реал” келаси ёз норвегиялик форвардни трансфер қилиши мумкинлиги ҳақида маълумотлар тарқалди. Холанднинг агенти Рафаэла Пинамонти эшиклар очиқ эканини айтди.

Энди “шаҳарликлар” 23 ёшли футболчини катта маош эвазига ушлаб қолмоқчи. The Mirror нашрининг ёзишича, айни пайтда Эрлинг ҳафтасига 437 минг евро ишлаб топмоқда ва у жамоадоши Кевин де Брюйне билан бирга энг катта маош олаётган ўйинчи ҳисобланади.

Клуб раҳбарияти Холандга янги шартнома беради. Унда ҳужумчининг ҳафталик маоши 700 минг евро бўлиши кўрсатилган.

Тўпурарнинг ҳозирги шартномаси 2027 йилнинг ёзигача тузилган. Манчестерликлар бу муддатни ҳам имкон қадар узоқроққа чўзишга ҳаракат қилади.