Спортчиларимиз нуфузли соврин кутяпти

Жорий йилнинг 30 март куни Халқаро конькичилар иттифоқи “SU Skating Awards-2025”нинг 8 та йўналишдаги ғолибларини эълон қилади.

Биз учун аҳамиятлиси, Ўзбекистон терма жамоаси таркибида халқаро мусобақаларда иштирок этаётган бир қатор спортчилар номи “SU Skating Awards-2025” даъвогарлари рўйхатида эътироф қилинди.

Конькида учишнинг жуфтлик йўналишида қатнашаётган спортчилар Екатерина Гейниш ва Дмитрий Чигирев "Мавсумнинг энг яхши дебютантлари" номинациясида ғолибликка даъвогарлар рўйхатида қайд этилди.

Шунингдек, жорий аср бошида терма жамоамиз шарафини ҳимоя қилган Татьяна Малинина ва Роман Скорняков "Энг яхши мураббий" йўналишида ғолиблик учун номзодлар рўйхатида келтириб ўтилган.

Эслатиб ўтамиз, Ўзбекистон терма жамоаси аъзолари Гейниш ва Чигирев жуфтлиги жорий йилнинг 25-30 март кунлари Америка Қўшма Штатларининг Бостон шаҳрида катталар ўртасида ўтадиган Жаҳон чемпионатида иштирок этади.