SPORTS.uz'да жаҳон чемпионати кундалиги (5-сон)

Қатарда жаҳон чемпионати давом этмоқда. SPORTS.uz сайти ижодкорлари ушбу мундиал кундалигини тақдим этади.

Эрон ўзига келмоқда. Форслар илк турдаги йирик ҳисобдаги мағлубият тасодиф эканлигини исботлашга уринмоқда. Қитъадошларимиз битта кам қолган рақиби дарвозасини 2 бор ишғол қилди.

Қатар жаҳон чемпионатидаги илк голини урди. Бироқ бу жамоанинг муваффақият қозонишига камлик қилди. Боз устига мезбонлар 2-турдаёқ чемпионатни тарк этадиган биринчи жамоага айланди.

Нидерландия Эквадор билан дуранг ўйнади. Аммо Луи ван Гал қўл остида жамоа мағлубиятсиз серияни 17 ўйинга етказиб олди.

Англия кутилмаганда АҚШ билан муросага келишга мажбур бўлди. Тур олдидан инглизлар фаворит саналаётганди. Бироқ улар буни амалда кўрсата олмади.

Уэльс - Эрон 0:2

Қатарда бўлиб ўтаётган жаҳон чемпионати гуруҳ босқичида 2-тур ўйинларига старт берилди. Дастлабки ўйин Уэльс ҳамда Эрон терма жамоалари ўртасида бўлиб ўтди. 90 дақиқа гол урилмаган ўйиннинг сўнгги 10 дақиқасида форслар икки тўп киритиб, ғалабани илиб кетди.

Дастлаб, 90+8-дақиқада Чешми узоқдан кучли зарба йўллаб, осиёликларни ҳисобда олдинга олиб чиқди. Сўнг орадан 3 дақиқа вақт ўтгач, Ризайян фарқни 2 тага ошириб қўйди ва баҳсга якуний нуқтани қўйди.

Европаликларнинг ушбу мағлубиятга сабаблардан бири сифатида жамоа дарвозабони Уэйн Хеннеси қизил карточка олгани бўлди. Айнан шундан сўнг форслар устунликни қўлга олди.

Гарет Бэйл Уэльс терма жамоасида ўзининг 110-ўйинида иштирок этди. Бу мамлакат термаси учун мутлақ рекорд ҳисобланади. 

Чешмининг голи 97-дақиқа-ю 56-сонияда киритилди. Бу жаҳон чемпионатида ғалаба келтирувчи сифатида урилган энг кеч гол бўлди. 

Уэльс посбони Уэйн Хеннесси мундиалда қизил карточка олиб, майдондан четлатилган 3-дарвозабонга айланди.

Эрон мазкур мундиалда аллақачон 4 та гол урди. Бу дегани терма аввалги мундиалларга қараганда 2 баробар кўпроқ тўп киритди.

Ушбу ғалабадан сўнг Эрон очколари сонини 3 тага етказиб олди ва 2-ўриндан жой олди. Уэльс ҳисобида 1 очко бор бўлиб, терма сўнгги поғонани банд этган.

Қатар - Сенегал 1:3

Навбатдаги тўқнашувда мезбон Қатар Африка чемпиони Сенегал билан куч синашди. Қизиқарли ва голларга бой ўтган ўйинда меҳмонлар 3:1 ҳисобида рақибдан устун келди.

Учрашувдаги илк гол 41-дақиқада киритилди. Мезбон мамлакат ҳимоячиларининг ишончсиз ҳаракатларидан сўнг Диа кучли зарбаси билан ҳисобни очишга эришди. Орадан 7 дақиқа ўтиб, иккинчи гол ҳам қатарликлар дарвозасидан жой олди. Бурчакдан узатиб берилган тўпни Дьеду боши билан дарвозага киритиб юборди.

Шундан сўнг, баҳсда бироз сокинлик юзага келди. Аммо 78-дақиқада қитъадошларимиз фарқни қисқартиришга муваффақ бўлди. Қанотдан оширилган тўпни Мунтари боши билан тўрга киритиб, Қатарнинг ўзи мезбонлик қилаётган жаҳон чемпионатидаги илк голига муаллифлик қилди.

Аммо бу ҳали якун эмасди. Қатар ҳисобни тенглаштиришга уринаётган бир вақтда сенегалликлар қарши ҳужумга ўтди. Ажойиб алдамчи ҳаракатлардан сўнг тўп Дьенгга етказилди ва у ишончли зарбаси билан ҳисобни 3:1 кўринишига келтирди.

Фактларга тўхталадиган бўлсак, Қатар дастлабки 2 учрашувда мағлуб бўлган мундиаллар тарихидаги биринчи мезбон мамлакат бўлди.

Сенегал жаҳон чемпионатларида мезбон давлат жамоасини енгган Африканинг биринчи жамоасига айланди.

Гуруҳдаги иккинчи беллашув (Нидерландия - Эквадор 1:1)дан кейин осиёликларда гуруҳдан чиқиш имкони қолмади. 2-турдан сўнг Нидерландия ва Эквадор ҳисобида бир хил 4 тадан очко бор. Сенегал 3 очко жамғарган. Қатар сўнгги турда нидерландларни мағлуб этса ҳам очколари сонини 4 тага етказа олмайди. Гуруҳдан фақат икки жамоа чиқади, холос.

Шу тариқа, мезбонлар охирги турни расмиятчилик ва мухлислар ҳурмати учун ўтказиб қўйишади. Сенегал эса Эквадор билан жиддий жангга киришади.

Нидерландия - Эквадор 1:1

2-турдан ўрин олган Нидерландия - Эквадор баҳси бўлиб ўтди. Мазкур беллашувда жамоалар 1:1 ҳисобидаги дурангга имзо чекди.

Дастлаб, 6-дақиқада Коди Гакпо ҳисобни очди. Жарима майдонига кириш қисмида Коди дарвозани ишғол қилди ва 23 ёшли футболчи мундиалдаги иккинчи голини урди.

49-дақиқа ўтиб бораётган бир пайтда Эннар Валенсия мувозанатни тиклади. Ушбу футболчи иккинчи турда ҳам жамоасига муҳим очкони тақдим этадиган гол муаллифига айланди. Фақатгина Валенсия ўйинни охиригача якунлаб қўя олмади. Чунки илк турда олган жароҳати безовта қилгани боис алмаштирилди.

Нидерландия терма жамоаси Луи ван Гал қўл остида мағлубиятсиз серияни 17 ўйинга етказди. Ушбу мутахассис 2021 йилнинг августида терма жамоа бош мураббийлигини қабул қилиб олганди. Ўшандан буён нидерландияликлар 12 ғалаба ва 5 дуранг қайд этишди.

Айни вақтда Нидерландия ва Эквадор "A" гуруҳида 4 очкодан тўплаган ҳолда, пешқадамликни қўлга олган.

Англия - АҚШ 0:0

ЖЧ-2022 2-туридан ўрин олган Англия - АҚШ баҳсида жамоалар дарвозаларга йўл топа олмади. Ваҳоланки, илк турдаги беллашувдан сўнг инглизлар бу турда фаворит саналаётганди.

Беллашув давомида жамоалар бир қатор хавфли ҳужумлар уюштирди. Айниқса, англияликлар баҳс якунига яқин кескин ҳужумлар сонини кўпайтирди. Аммо бу европаликларга наф келтирмади. Бу ушбу мундиалда 0:0 ҳисобида якунланган 5-ўйин бўлди. Аввалроқ Дания - Тунис, Мексика - Польша, Марокаш - Хорватия, Уругвай - Жанубий Корея учрашувида ҳисоб очилмаганди.

XXI асрда гуруҳ босқичида энг кўп 0:0 ҳисоби 2010 йилги ЖЧдаги 6 ўйинда кузатилганди. 2006 ва 2014 йилда 5 та, 2002 йилда 2 та, 2018 йилда эса битта ўйин 0:0 ҳисобида якунланганди. 

Англия очколари сонини 4 тага етказиб олган ҳолда, "B" гуруҳида пешқадам бўлиб турибди. АҚШ ҳисобида ҳозирча 2 очко мавжуд ва улар Эрондан кейинги 3-ўринни банд этган.

Дунёга машҳур "Goal" нашри жаҳон чемпионати ғолиблигига даъвогар жамоаларнинг кучли йигирмалигини тузиб чиқди.

Унда термаларнинг 1-турдаги ўйини таҳлил қилинган ва рейтинг шунга асосланган. Англия термаси "Goal" талқини бўйича ЖЧ фаворитлари қаторида 6-поғонадан 4-ўринга кўтарилганини кўриш мумкин.