Стол теннисчиларимиз Молдовада тенгсиз бўлди

Стол теннис бўйича Ўзбекистон ёшлар терма жамоаси Мольдованинг Дубоссар шаҳрида ўтказилган ўқув-машғулот йиғини доирасида халқаро турнирда ҳам иштирок этди.

Дунёнинг тўққиста давлатдан келган 200га яқин спортчи иштирок этган мазкур мусобақада терма жамоамиз иккитадан олтин ва кумуш ҳамда учта бронза медалларини қўлга киритиб, умумжамоа ўртасида шоҳсупанинг энг юқори поғонасига кўтарилди.

Мусобақада Муҳаммад Ўктамбоев ва Мақсуд Рустамоқ барча рақибларини енгиб олтин медални қўлга киритган бўлса, финалга қадар муваффақиятли иштирок этган Шерзод Мамажонов ҳамда Румия Лутфуллина терма жамоамизга кумуш медалини келтирди.

Шунингдек, Мақсуд Нурпўлатов, Сайёра Абдуҳалилова ва Робия Маҳмудова каби истеъдодли ёш стол теннисчиларимиз бронза медалига сазовор бўлди.

Стол теннисчиларимизнинг ушбу ғалабалари замирида мамлакатимизда Олимпия ўйинлари туркумидан жой олган спорт турларини аҳоли ўртасида янада оммалаштириш ва мазкур спорт тури билан шуғулланаётганлар учун давлатимиз томонидан яратилаётган кенг имкониятларни кўриш мумкин.