Султонмуродов ОКМК билан ўйиндан кейин қайси жамоага раҳмат айтди?

ОКМК Суперлига биринчи турида "Сурхон" устидан зафар қучди (3:1). "Пахтакор" стадионида ўтган ўйиндан кейин термизликлар вакили Шоҳжаҳон Султонмурдовнинг фикрларига қулоқ тутдик.

— Аввало, Ўзбекистон чемпионати старт олгани билан бутун футбол аҳли ва мухлисларни табриклайман. Ўйинни яхши бошлаган эдик. Кейин воқеалар ривожи ўзгариб кетди. Бу биринчи расмий ўйинга чиққанимиз туфайли бўлса керак. Янги жамоа шакллантириляпти, футболчилар ва легионерлар янги. Бироз вақтдан кейин барчаси изига тушиб кетади.

— 2021 йилни "Олимпик" билан Про лигада ўтказган эдингиз. Кейин узоқ муддатли танаффус бўлди ва сизни "Хоразм" таркибида кўрдик. Ҳозир яхши спорт формасидамисиз?

— Жароҳат футболчининг энг катта душмани, деб бекорга айтишмайди. 9 ой майдон ташқарисида қолиб кетдим. Тузалганимдан кейин "Хоразм" жамоаси чақирди ва тикланиб олишим учун катта ёрдам берди. Энди Суперлига ритмига тушиб олсам, кейин Олимпия терма жамоасига қайтиш учун ҳаракат қиламан.

— Қишки йиғинни "Бунёдкор" сафида бошлаган эдингиз. Пойтахт клубидан кетиб қолишингизга сабаб нима эди?

— Мени Иван Бошкович ва Азиз Ҳайдаров чақирганди. Ўйиним уларга маъқул келиб, жамоада қолишимни сўрашди. Кейин клубда тушунарсиз ишлар бошланиб кетди. Мени таркибга жалб қилганлар кетиб қолишди. Натижада агентларим билан маслаҳатлашиб, "Сурхон"га ўтишга қарор қилдим.

ФР суҳбатлашди.