Суперклуб атиги иккита гол урган ҳужумчини таркибдан йўқотади

«Ювентус» форварди Лоис Опенда трансфер рўйхатига қўйилди, деб хабар бермоқда Gazzetta dello Sport.

Маълумотларга кўра, туринликлар футболчи бўйича аллақачон бир қатор клублардан таклифлар қабул қилган. Жумладан, «Ланс», «Лион», «Ренн» ва «Ковентри» Опендага қизиқиш билдирган.

Тажрибали ҳужумчи ўтган ёзда «Лейпциг» клубидан «Ювентус»га ижара асосида келган эди. Шартномага кўра, мавсум якунида уни 46 миллион евро миқдоридаги умумий сумма эвазига тўлиқ сотиб олиш мажбурияти ҳам кўзда тутилган.

Аммо бу трансфер «Ювентус» учун деярли омадсиз қарорга айланди. Опенда жамоа сафида 34 ўйинда майдонга тушиб, бор-йўғи икки марта гол урди. Белгиялик футболчи 2025 йил декабридан бери рақиб дарвозасини ишғол қила олмаган, мавсумнинг сўнгги 11 учрашувида эса жами тўрт дақиқа ўйнаган, холос.

Хабарларга кўра, «Ювентус» ҳозирча Опендани тўлиқ сотиш билан чекланиб қолмасдан, уни кейинчалик сотиб олиш ҳуқуқи билан ижарага бериш вариантларини ҳам кўриб чиқишга тайёр.