Тадқиқот: Жаҳон чемпионати компанияларга миллиардлаб доллар зарар келтириши мумкин

Жаҳон чемпионати футбол мухлислари учун катта байрам бўлса-да, иш берувчилар учун муайян муаммоларни келтириб чиқариши мумкин.

UKG компанияси томонидан Австралия, Канада, Франция, Германия, Мексика, Нидерландия, Буюк Британия ва АҚШдаги 8000 нафар ходим ўртасида ўтказилган сўровнома натижаларига кўра, турнир сабаб иш унумдорлиги пасайиши мумкин. Тадқиқот муаллифлари ҳисоб-китобича, бу ҳолат иш берувчиларга тахминан 17 миллиард долларга тушади. Шундан 11,7 миллиард доллари АҚШ ҳиссасига тўғри келади.

Сўров иштирокчиларининг 37 фоизи Жаҳон чемпионати туфайли иш жадвалига ўзгартиш киритишни режалаштирмоқда. Шунингдек, 27 фоиз ходим ўйин куни камроқ ишлаши мумкинлигини билдирган. Улар кечроқ ишга келиш, эртароқ кетиш ёки умуман ишга чиқмаслик эҳтимолини истисно қилмаган.

Ходимларнинг 26 фоизи раҳбарларининг сабр чегарасини синаб кўришни режалаштираётганини тан олган. Улар орасида 14 фоиз киши ўйинлар ва видеошарҳларни яширинча томоша қилиш ниятида.

Тадқиқотга кўра, ҳар бешинчи ходим (22 фоиз) ўйинлар сабаб чарчаган ҳолда ишга чиқишини кутмоқда. Яна 11 фоиз иштирокчи эса ишга хумордан чиқмаган ҳолда келиши мумкинлигини айтган.

Қатнашчиларнинг 39 фоизи иш берувчилар Жаҳон чемпионатига бефарқ деб ҳисоблайди. Шунингдек, ҳар бешинчи ходим (19 фоиз) иш жадвали турнирни кузатиш имкониятига салбий таъсир қилса, янги иш қидириш ҳақида ўйлаб кўришини билдирган.

Менежерлар оддий ходимларга нисбатан кўпроқ таътил олишни режалаштирмоқда. Уларнинг 42 фоизи дам олиш куни олиш ниятида бўлса, ходимлар орасида бу кўрсаткич 24 фоизни ташкил этган. Шунингдек, менежерларнинг 50 фоизи иш жадвалини олдиндан ўзгартиришни сўрамоқчи, ходимларда эса бу рақам 34 фоизни ташкил қилган.

Умуман олганда, сўров иштирокчиларининг 33 фоизи Жаҳон чемпионати давомида камида бир кунлик таътил олишни режалаштирмоқда.