Темиров "Атлетико" дарвозасига гол уришини кутганмиди? Баҳсдан сўнг қайси ўйинчининг футболкасини олди? Легионеримиз билан суҳбат

Гонконгнинг “Китчи” клуби шарафини ҳимоя қилаётган ҳамюртимиз Шерзод Темировнинг у ердаги фаолияти яхши давом этяпти.

Хабарингиз бўлса керак, куни кеча “Китчи” жамоаси ўз майдонида Испаниянинг номдор клуби – Мадриднинг “Атлетико”сига қарши ўртоқлик учрашувини ўтказди.

Гарчи беллашувда “Китчи” 1:6 ҳисобида ютқазган бўлса-да, биз учун эътиборлиси, ягона голни ҳамюртимиз Шерзод Темиров киритди. Ҳужумчимиз таассуротлари билан ўртоқлашди.

- “Атлетико”га қарши ўртоқлик ўйини қандай ўтди? Натижа чиндан ўйинга мосмиди?

- Бу ўйинга яхши тайёргарлик кўргандик. Ўйин анча қизиқарли бўлди. Лекин натижа биз учун яхши бўлмади. Асосийси, ўзимизнинг тактик ишланмаларимизни синаб кўрдик ва ўзимизга керакли муҳим деталларни билиб олдик. Бундай учрашувлар доим жуда қизиқ ўтади. Мана шундай топ клубларга қарши тўп суриш бизга тажриба беради.

- Сиз “Атлетико” дарвозасига гол урдингиз.  Ўша вазиятда нималарни ҳис қилдингиз? Буни кутганмидингиз?

- Тўғрисини айтсам, кутмагандим. Лекин ниятим бор эди. Кутган нарсаларингиз кутилмаганда келаркан. Кўнглимдан биринчи навбатда ота-онам ва оила-аъзоларимнинг ўйиндан олдин айтган мотивациялари келди. Ўша вазиятда жуда қувониб кетдим.

- Ўйиндан кейин “Атлетико”ни қайси футболчиси билан футболка алмашдингиз?

- Феликсни формасини олдим ва у билан дўстона хайрлашдик.

- Сиз бу ўйинда “Атлетико”дан ўзингиз учун нима ўргандингиз?

- Бу жамоадан ўрганадиган жиҳатларимиз жуда кўп. Уларнинг асосан кучли тарафи тезкор ҳужум қилиб, ҳужумларини ижобий якунлаши ёқди. Асосан ўзимни чизиғимда тўп сурадиган ўйинчиларни кўпроқ кузатаман. Соло ва Феликснинг ҳаракатлари менга жуда ёқди.

- Бу сизга қарши ўйнаган энг номдор жамоа, шундайми? Олдинлари яна қайси таниқли клуб ёки футболчиларга қарши ўйнагансиз?

- Ҳа, тўғри, бу номдор клубга қарши ўйин эди. Илгари “Зенит”, “Спартак” каби клубларга қарши ўйнаганман. Ўйлашимча, гранд жамоаларга қарши ўйинларимиз олдинда, Худо хоҳласа.

- Янги мавсумга тайёргарлик қандай олиб борилди? Асосий мақсадингиз нима?

- Биринчи тиббий кўрикдан кейин икки ҳафталик йиғин ўзимизда бўлди. 1 та ўйин ўтказиб, Таиландга икки ҳафталик ўқув-машғулот йиғинига жўнаб кетдик. У ерда 3 та ўртоқлик учрашуви ўтказдик ва яхши тайёргарлик кўриб қайтдик. Янги мавсумга юқори вазифа қўйилган. Бунинг учун ҳар бир учрашувда боримизни берамиз.

Шуҳратбек Жўраев.