Темур Кападзе: "Ҳозирги таркибимиз Қатардан кучли"

ЖЧ-2026 саралаши доирасидаги ЎЗбекистон - Қатар беллашув олдидан терма жамоамиз бош мураббийи Темур Кападзе ва жамоа сардори Элдор Шомуродов матбуот анжуманида иштирок этди.

- Биринчи навбатда барчани ғалаба билан табриклаймиз. Эртага бизни яна бир муҳим баҳс кутмоқда. Ушбу беллашувда ҳам яхши натижага эришиб, саралашни ажойиб натижалар билан якунлашга ҳаракат қиламиз.

- Жамоада кайфият яхши. Жароҳатлар ҳар доим бўлиб туради. Эртанги ўйинда бу омиллар таъсир ўтказмайди деган умиддамиз.

- Остон Ўрунов ва Отабек Шукуровда  жароҳатлар бор. Ҳолатга қараймиз, агар Шукуровнинг ҳолати яхши бўлса, у майдонга тушиши мумкин.

- Биз кутган натижамизга эришдик, бироқ ҳар бир баҳсда босим бўлади. Шунинг учун эртанги беллашувни яхши натижа билан якунлашга ва ушбу байрамни мухлислар билан биргаликда нишонлашга қўлдан келганча ҳаракат қиламиз.

- Жамоадаги ҳозирги схема анча муддатдан бери шаклланиб келган. Баъзи бир қисмларга ўзгартириш киритдик,  камчиликларни тўлдирдик ва қийин вазиятдан чиқиб кета олдик.

- Қатарга қарши сўнгги беллашувлар жамоага қийинчилик туғдирди. Жумладан, Осиё кубоги ва саралаш доирасининг биринчи даврасида жамоамиз рақибларга имкониятни бой берди. Бироқ, ишонч билан айта оламанки ҳозирги жамоа Қатардан кучли.