Темурхўжа Абдухолиқов “Локомотив”га қайтадими?
Ads

Иқтидорли ҳужумчи Темурхўжа Абдуҳолиқов Қатарнинг “Ал Сайлия” клубини тарк этганидан бери ҳали янги жамоаси номини эълон қилгани йўқ. Айримлар эса унинг аллақачон бирор-бир жамоа билан келишиб олгани ҳақида ҳам айтишмоқда. Шунингдек, Абдуҳолиқовни “Локомотив”га боғлаётганлар ҳам йўқ эмас.

- Биринчи навбатда бизни қизиқтираётган савол – бу Темурхўжа Абдуҳолиқов кейинги фаолиятини қаерда давом эттиради? Бизнингча, бу масала бироз чўзилиб кетгандек...

- 30 июнь куни менинг “Ал Сайлия” билан тузган шартномам тугади. Олдимда эса 2-3 та жамоалардан аниқ ва жиддий таклифлар бор. Қайси жамоани танлашимни яқин орада билиб оласиз.

- Кўпчилик сизни яна “Локомотив”га қайтишингиз мумкинлиги ҳақида гапирмоқда. Бу ҳақиқатга қанчалик яқин?

- Ҳа, “Локомотив”га қайтишим мумкинлигини инкор қилмайман. Ҳар ҳолда бу вариант ҳам йўқ эмас.

- Қачон якуний қарорингизни эълон қиласиз?

- Тез орада.

- Қатар чемпионатидан қайтиб келганингизга анча бўлди. Шу вақт давомида спорт формангизни ушлаб туриш учун қаерда шуғулланиб турибсиз?

- Ўзим якка тартибда шуғулланиб, спорт формамни ушлаб турибман. Бу борада ҳавотирга ўрин йўқ.

- Легионер сифатида фаолият олиб боришдан чарчамадингизми?

- Йўқ, нега? Ҳозир ҳам менга четдан таклифлар бор. Ҳаммасини тош-у, тарозига солиб кўряпман. Шундан кейин якуний қарорга келаман.

- Хориждан айнан қайси клублар томонидан қизиқишлар бўляпти?

- Клубларнинг номини айтсам нотўғри бўлса керак. Улар Эрон, Қатар ва Саудия Арабистонидан.

- Янги клубни танлашда кўпроқ нималарга аҳамият қаратяпсиз?

- Ўйин амалиётига, 1-ўрин учун курашишига ва чемпионати қанчалик кучли эканлигига.

- Бу борада молиявий маблағ ҳам клуб танлаётганингизда ўз таъсирини кўрсатадими?

- Юқорида айтиб ўтганларим 1-2-факторлар саналади. Молиявий жиҳати эса мен учун 4-даражада.

- Дарвоқе, жаҳон чемпионатини ҳам кузатиб боряпсизми?

- Ҳа, албатта. Жаҳон чемпионатида яққол фаворит ва яққол аутсайдер йўқ. Гуруҳ босқичида фаворитлар кўринмади. Плей-офф босқичида ҳам бир нима дейиш қийин. Энг яхшиси, ўйинларни мириқиб кузатишдир.

- Укангиз Орифхўжа Абдуҳолиқовни ҳам кузатиб турамиз. У асосан қуйи лигада ўйнаб келяпти. Сиз каби қачон фаолиятида ўсиш бўлади деб ўйлайсиз?

- Мен ҳам унинг ривожланишини хоҳлайман. Қуйи лигада икки йилдан бери тўпурар бўлиб келяпти. Унга ишонаман. Келажакда Суперлигада ҳам тўпурар бўла олади.

Шуҳратбек Жўраев суҳбатлашди.