Тен Хаг келса ҳам, “Юнайтед”да қолмайман!

“Манчестер Юнайтед” ярим ҳимоячиси Жесси Лингард ёзда жамоадан кетиш ҳақидаги фикрини ўзгартирмаслигини билдирди.

“Манчестер Юнайтед”дан кетмоқчи бўлаётган айрим ўйинчилар, якуний қарорга келишдан олдин янги тайинланган бош мураббий Эрик тен Хаг билан суҳбатлашиб олишни маъқул кўрмоқда.

Бироқ, Лингард бундай қилмоқчи эмас.

29 ёшли футболчи январдаёқ “Ньюкасл”га ўтмоқчи бўлганди. Лекин клуб мутасаддилари бу трансферни блоклаб қўйди. Гарчи “Манчестер Юнайтед” ҳужумкор футболчига янги битим таклиф қилган бўлса-да, ўзига берилаётган ўйин вақтидан норози бўлган Лингард шартномани қабул қилмади.

Ёзда эркин агентга айланадиган ўйинчи ўзига билдириладиган ҳар қандай таклифни кўриб чиқишга тайёрлигини маълум қилди. Жесси бу мавсум барча турнирларда 22 та учрашув ўтказиб, иккита гол уришга муваффақ бўлди.