Теннисчимиз Туркияда икки финални бой берди

Туркиянинг Анталия шаҳрида M25 таснифига кирувчи халқаро теннис турнирида Сергей Фомин яккалик ва жуфтлик баҳсларида финалда иштирок этди.

Мамлакатимизнинг иккинчи рақамли теннисчиси Сергей Фомин яккалик беллашувларнинг финал босқичида украиналик Олексей Крутихга уч сетда 7:6, 3:6, 5:7 ҳисобида имкониятни бой бериб қўйди.

Натижада эса нуфузли мусобақанинг вице-чемпионига айланган ҳолда 2701 АҚШ доллари пул мукофоти ва 16 рейтинг очкосини қўлга киритди.

Шунингдек, Сергей Фомин турнирнинг жуфтлик беллашувларида нейтрал теннисчи Павел Вербин билан тандем ҳосил қилиб, ярим финалда финляндиялик Патрик Каукоялта ва Еро Васани 6:4, 3:6, 10:6 ҳисобида таслим қилди.

Сўнгги ҳал қилувчи финал ўйинида туркиялик теннисчилар дуэти – Гонберк Саритас ва Мерт Нажи Туркерга қарши кортга чиқди.

Афсуски, мазкур учрашувда Сергей ва Павелга бироз омад етишмади. Натижада турнирнинг жуфтлик йўналишида вице-чемпионга айланди.