Терма жамоа футболчиси 15 ўйингача дисквалификация қилинади

Уругвай терма жамоаси аъзоси Агустин Каноббио Испанияга қарши ўйинда майдондан четлатилгандан сўнг ҳакамга жисмоний таъсир кўрсатгани учун узоқ муддатга дисквалификация қилиниши мумкин.

Жаҳон чемпионати гуруҳ босқичи 3-туридан ўрин олган Уругвай – Испания (0:1) учрашувининг 90+4-дақиқасида Каноббио рақибга нисбатан қўпол ўйин учун тўғридан-тўғри қизил карточка олди. Шундан сўнг у бош ҳакам Исмаил Элфатни туртиб юборди.

ФИФАнинг интизомий регламенти 14-моддасига кўра, расмий шахсларга нисбатан содир этилган қоидбузарликлар учун бир нечта даражада жазо чоралари белгиланган. Спортга хос бўлмаган хулқ-атвор камида тўртта ўйингача дисквалификация ёки маълум муддатга майдондан четлатиш билан жазоланади. 

Ҳакамни қўрқитиш ёки таҳдид қилиш камида ўнта ўйингача дисквалификацияни назарда тутади. Ҳакамга ҳужум қилиш – шу жумладан тирсак, мушт, оёқ билан уриш, тишлаш ёки туфлаш – камида ўн бешта ўйингача майдондан четлатиш билан жазоланади.

Якуний қарор Каноббионинг ҳаракатлари расмий рапортларда қандай қайд этилиши ва ФИФА интизомий қўмитаси уларга қандай баҳо беришига боғлиқ бўлади.