Тезкор! Файзуллаевга Италиянинг машҳур жамоаси харидор!
Ўзбек футболининг энг иқтидорли тарбияланувчиларидан бири Аббосбек Файзуллаев ҳар қандай чемпионат ва мусобақада ўйнай олишини кўрсатиб келмоқда.
20 ёшли футболчимиз Ўзбекистоннинг турли терма жамоалари сафида халқаро майдондаги қитъа ва жаҳон миқёсидаги мусобақаларда муваффақиятли иштирок этиб келмоқда.
Шунингдек, легионер сифатидаги илк мавсумидаёқ Россия Премьер-лигаси ва мамлакат кубоги ўйинларида маҳорат кўрсатяпти. Мавсумнинг асосий кашфиёти сифатида эътироф этилаётган Файзуллаев Европанинг кучли лигаларига ўтиш учун асосий даъвогарлардан ҳисобланади.
Сўнгги маълумотларга қараганда, ўзбек футболчисига Италиянинг энг қадимий жамоаларидан бири “Парма” қизиқиш билдирмоқда. Ушбу клуб 1913 йилда ташкил этилган ва катта тарихга эга, Италия футболида ўз ўрни бор жамоалардан ҳисобланади.
“Парма” фаолиятини ёритиб бораётган parmalive.com сайти эксперти Жузеппе Эмануэле Фризоне ушбу жамоа ўзбек футболчисини кузата бошлагани ҳақида маълумот тарқатди.
- А Серияга чиқиш учун курашни давом эттираётган “Парма” ҳозирдан таркибни кучайтириш имкониятларини кўриб чиқмоқда. Манбаларнинг таъкидлашича, клуб Марказий Осиёнинг юлдуз даражадаги ўйинчисини кузатувга олган. Бу Аббосбек Файзуллаев.
Аббос техникаси кучли плеймейкер ва ёш ҳужумчи сифатида Москванинг ЦСКА жамоаси шарафини ҳимоя қиляпти. Бу футболчи айниқса, голларга ассистент сифатида самарали ўйнамоқда.
Ҳужумкор ўзбек футболчиси ўз қитъасининг энг салоҳиятли ёш ўйинчиларидан ҳисобланади ва сўнгги ойларда унга “Бавари” қизиқиш билдираётгани ҳақида маълумотлар чиқарилмоқда, - деб ёзди Жузеппе Эмануэле Фризоне.
“Парма” айни пайтда В Серияда иштирок этмоқда. Пармаликлар 33-турдан сўнг, 69 очко билан мусобақа жадвалида пешқадам бўлиб турибди. Бу жамоа энг яқин таъқибчиси “Комо”дан беш очкога ўзиб кетган.
Аббосбек Файзуллаев куни кеча Россия кубоги ярим финалида “Балтика” дарвозасини ишғол қилиб, ЦСКАни финалга олиб чиқди. Легионеримиз ЦСКА сафида жами 25 та ўйинда қатнашиб, тўртта гол ва 11 та ассист қайд этган.
Transfermarkt портали “армиячилар” билан 2026 йилнинг ярмигача давом этадиган шартномага эга футболчимизни 5 миллион еврога баҳоламоқда.
Фикрлар