Tezkor! Shomurodov umuman kutilmagan jamoadan taklif oldi!
Evropada transferlar oynasi yopilish arafasida tarkibini kuchaytirmoqchi bo‘layotgan jamoalar so‘nggi urinishlarini amalga oshirmoqda.
Xususan, “Roma”da o‘yin amaliyotisiz qolib ketayotgan hujumchi Eldor Shomurodovga kutilmagan xaridor paydo bo‘ldi.
La Gazzetta dello Sport nashrining ma’lum qilishicha, A Seriya vakillaridan “Lechche” transferlar oynasining oxirgi kunida o‘zbek hujumchisini so‘rab, “Roma”ga murojaat qilgan.
Rimliklar ustozi Joze Mourino “Montsa”ga qarshi o‘tkazilgan uchrashuvdan keyin Eldor Shomurodovning transferi masalasi atrofida yuzaga kelgan bosim pasaygani va hujumchi endi jamoaga yordam berishi mumkinligini ta’kidlagan edi.
Ekspertlar portugaliyalik mutaxassisning bu gaplari Shomurodovning “Roma”da qolishi anglatadi, deb baholagan.
Shunga qaramay, “Lechche” sport direktori Pantaleo Korvino Eldor Shomurodovni qo‘lga kiritishga urinmoqda.
Eslatib o‘tamiz, Eldor Shomurodovga Italiyaning o‘zidan “Bolonya”, “Torino”, Montsa”, “Sassuolo”, “Sampdoriya”, “Salernitana” kabi jamoalar qiziqish bildirgani haqida xabarlar tarqatilgan edi.
Shuningdek, O‘zbekiston terma jamoasi hujumchisini olish maqsadida Turkiyaning eng mashhur klublari - “Trabzonspor”, “Galatasaroy” va “Beshiktosh” rimliklar bilan muzokara olib borgan.
Yozgi transferlar mavsumida davomida Eldor Shomurodovga Angliya, Frantsiya, Germaniya, Saudiya Arabistoni jamoalaridan chorlovlar bo‘lgani haqida ham xabarlar tarqatildi. Biroq, hamyurtimiz faoliyatini Italiyada davom ettirishni maqsad qilgani bois, bu chorlovlar rasmiy takliflar va muzokaralargacha etib bormadi.
Eldor Shomurodov “Mash’al”, “Bunyodkor”, “Rostov”, “Jenoa” va “Roma” jamoalari safida jami 221 ta uchrashuvda maydonga tushib, raqiblar darvozasini 45 marotaba ishg‘ol qilgan va jamoadoshlariga 23 ta golli uzatma oshirgan.
27 yoshli hujumchimiz o‘tgan mavsumda "Roma" safida 40 ta uchrashuvda qatnashib, beshta gol va oltita golli uzatma muallifi bo‘ldi. Shuningdek, Eldor faoliyatidagi dastlabki sovrin - UEFA Konferentsiyalar ligasi chempionligiga sazovor bo‘ldi.
Shuningdek, O‘zbekiston milliy terma jamoasi safida jami 53 ta bellashuvda qatnashib, o‘z hisobiga 30 ta gol yozdirib qo‘ygan.
Transferlarga ixtisoslashgan https://www.transfermarkt.world portali bir necha pozitsiyada o‘ynay oladigan forvardni sakkiz million evroga baholagan. Biroq, Rim klubi o‘tgan yili Shomurodov uchun “Jenoa”ga 18 million evro sarflaganini inobatga olib, xaridorlardan o‘zbek futbolchisi uchun 14 million evro talab qildi.
Fikrlar