Тимур Кападзе 2025 йилда дунёнинг энг кучли миллий жамоа мураббийлари ўнталигига кирди

Ўзбекистон миллий жамоасининг собиқ бош мураббийи Тимур Кападзе 2025 йил якунларига кўра дунёдаги энг кучли миллий жамоа мураббийлари орасида саккизинчи ўринни эгаллади.
Халқаро футбол тарихи ва статистикаси федерацияси томонидан тузилган рейтингда Кападзе 10 очко тўплаб, Колумбия миллий жамоаси мураббийи Нестор Лоренсо билан бир хил натижа қайд этди.
Рейтингда биринчи ўринни Испания терма жамоаси мураббийи Луис де ла Фуэнте эгаллади. Кейинги ўринлардан Португалия миллий жамоаси устози Роберто Мартинес ҳамда Аргентина терма жамоаси мураббийи Лионель Скалони жой олди. Шунингдек, кучли ўнликка Норвегия, Англия, Франция, Марокаш ва Мексика миллий жамоалари мураббийлари ҳам кирди.

Аввалроқ Тимур Кападзе Индонезияда кўрингани ортидан унинг ушбу мамлакат миллий жамоасига ўтиши мумкинлиги ҳақида миш-мишлар тарқалган эди. Аммо кейинчалик "Навбаҳор" клуби уни жамоанинг янги бош мураббийи сифатида расман таништирди.