Тимур Кападзе легионерларнинг таркибга қўшилиши, Осиё кубоги фаворитлари, ўртоқлик ўйинига рақиб топилмагани ҳақида гапирди (матбуот анжумани)

Бугун ЎФА раҳбарияти ҳамда Олимпия терма жамоамиз бош мураббийи иштирокида матбуот анжумани ўтказилди. Унда ЎФА биринчи вице-президенти Равшан Ирматов ва термамиз бош мураббийи Тимур Кападзе сўзга чиқиб, журналистларнинг саволларига жавоб бериб ўтишди. 

Тимур Кападзе:

- Ассалому алайкум! Олдинда бизни ўта муҳим мусобақа кутиб турибди. Ёруғ юз билан турнирни якунлаймиз, иншааллоҳ. Мақсадга эришиш йўлида бизда ҳамма нарса етарли. Салоҳиятимиз ҳам, таркибимиздаги футболчилар даражаси ҳам биз учун ажойиб даражада. 

Легионерлар бўйича гапирадиган бўлсам, агентлар олдинроқ клубдагиларга айтиб қўйишганида балки, трансфер амалга ошмасди. Аммо Жанубий Кореяда барча легионерлар чақириб олинган ва улар тўлиқ таркиб билан машғулотлар олиб боришмоқда. 

Ҳатто миллий терма жамоамизда легионерлар энг муҳим аҳамиятга эга экани Осиё кубогида сезилиб қолди. Шомуродовнинг жароҳати ҳужумдаги сермаҳсуллигимизга етарлича таъсир ўтказди. 

Қатарга бориб, у ернинг об-ҳавоси ва атмосфераси билан танишиб келишни мақсад қилгандик. Кутилмаганда, 1-2 кун ёмғир ёғди. Буни маҳаллий мутахассислар ҳам кутмаганини айтиб ўтишди. 

Мезбон юрт вакилларининг турнирга катта куч билан тайёргарлик кўраётганига гувоҳ бўлдик. Ўйлашимча, мазкур терма ҳам ҳар қандай рақибига муносиб қаршилик кўрсата олади. 

Хитой билан олдинда ўртоқлик ўйини бор. Бу гуруҳдаги рақибларимиздан келиб чиқиб танланди. Олдинроқ бошқа термалар билан ўйин ўтказиш режа қилинганди. Аммо рақиб топилмади.

Япония, Жанубий Корея ва Австралияни ғолибликка асосий даъвогарлар қаторида эътироф этишим мумкин. Бироқ бошқа жамоалар ҳам сюрприз қилиб бериши мумкин. Энг кучлилар сифатида барибир юқоридаги уч терма катта тош босиб кетади. 

Ҳаммаси биз ўйлагандек давом этса, Олимпиадага миллий терма жамоадан ҳам футболчи жалб қилишимиз мумкин. Бу ҳам ҳозирда режага киритилган. Аммо айнан қайси футболчи таклиф этилиши аниқ эмас.

Ҳозирда бор эътиборимиз Олимпиада йўлланмасини қўлга киритишга қаратилган. Қолганлари икккинчи ўриндаги масала ҳисобланади.