Токио-2020. Спортчиларимизнинг бугунги чиқишлари якунланди

Ассалому алайкум, муҳтарам спорт ихлосмандлари! Токио шаҳри мезбонлик қилаётган Олимпия ўйинларининг энг сўнгги янгиликларини эътиборингизга ҳавола этишда давом этамиз. Бугун, 4 август куни 6 нафар юртдошимиз ўз юришини бошлайди. Кун давомида уларнинг натижаларини онлайн ёритиб борамиз! Янгиликларни SPORTS.uz сайти орқали кузатиб боринг!

18:02. Токио-2020 Олимпия ўйинлари доирасида аёллар ўртасидаги кўп кураш баҳсларининг бугунги дастурлари якунланди. Унда 4 дастурда беллашувлар бўлиб ўтди.

Екатерина Воронина 100 метрга тўсиқлар оша югуриш ва 200 метрга югуриш дастурларида ўз шахсий рекордини янгилашга муваффақ бўлди. Қуйида Воронинанинг бугунги дастурларда қайд этган натижаси ва тўплаган очколари билан таништирамиз:

100 метр, тўсиқлар оша: 14.19 сония (952 очко);
Баландликка сакраш: 1.77 метр (941 очко);
Ядро улоқтириш: 13.76 метр (778 очко)
200 метр: 24.67 сония (917 очко);
Жами: 3588

Ҳозирда Воронина 3588 очко билан 20-ўринда турибди.

15:25. Кураш. 2 нафар курашчимизда бронза медали учун курашиш имконияти пайдо бўлди. Яъни, Ғуломжон Aбдуллаев (-57 кг) ва Жавраил Шапиев (-86 кг)нинг рақиблари финалга йўл олди. Бу дегани вакилларимиз бронза медали учун ўтиш баҳсида иштирок этади. Эртага бўлиб ўтиши режалаштирилган беллашувда Абдуллаевга Томас Гилман рақиблик қилса, Шапиев Стефан Рейхмусга қарши гиламга чиқади.

11:20. Баҳодир Жалолов финалдааааааа! Рақиби жароҳат сабабли жангни давом эттира олмади. Яшавор Баҳодир!

11:17. Иккинчи раундда Жалолов нокдаунга тушиб қолди. Барчасини учинчи раунд ҳал қилади. Олға Баҳодир!

11:14. Баҳодир Жалолов биринчи раундни ўз фойдасига ҳал этди, 5:0.

10:57. Бокс: +91 кг вазнда Баҳодир Жалолов иштирокидаги жанг бошланмоқда. Жалоловга ярим финалда британиялик Кларк Фрейзер рақиблик қилади. 

9:32. Вакилимиз россиялик рақибиги имкониятни бой бериб қўйди.  Бир неча сония қолганида россиялик полвон ҳисобни тенглаштириб, сўнгги баллни қўлга киритгани эвазига ғалабани илиб кетди. Энди Угуев финалга борган тақдирда Абдуллаев бронза медали учун курашади.

9:24. Дастлабки 3 дақиқаликдан сўнг ҳисоб 2:2. Бўшашма Ғуломжон!

9:20. Бироздан сўнг Ғуломжон Абдуллаев гиламга чиқиб келади. Чорак финалда вакилимизга россиялик Завур Угуев рақиблик қилади.

8:40. Каноэчиларимиз: Дилноза Раҳматова ҳам чорак финалда тўхтади. Вакиламиз маррага учинчи бўлиб кириб келди. Регламентга кўра, чорак финалда ўз гуруҳларидан энг яхши натижа қайд этган икки нафардан спортчи кейинги даврада иштирок этади.

8:35. Каноэчиларимиз: Нилуфар Зокирова чорак финалда 6-ўринни эгаллади ва яккалик баҳсларида ўз иштирокини якунлади.

8:30. Эркин кураш: -57 кг вазнда юртимиз шарафини ҳимоя қилаётган Ғуломжон Абдуллаев илк ғалабасига эришди. Вакилимиз дастлабки даврада хитойлик полвон Лиу Мингҳуни мағлуб этди ва чорак финалга йўл олди. 

7:34. Эркин кураш: Жавраил Шапиев эронлик эронлик Ҳасан Язданига қарши  гиламга чиқди ва мағлуб бўлди. Энди эронлик курашчи финалга етиб борган тақдирда Шапиев бронза медали учун курашиш имконини сақлаб қолади.

6:34. Каноэчиларимиз: Дилноза Раҳматова ҳам 200 метрга кечган саралаш босқичидаги биринчи стартини якунлади. Вакиламиз 47.716 сония натижа билан ўз гуруҳида 5-ўринни қайд этди. Раҳматова ҳам шу тариқа чорак финалга йўл олди.

6:18. Каноэчиларимиз: Нилуфар Зокирова 200 метрга кечган саралаш босқичидаги биринчи стартини якунлади. Ҳамюртимиз 49.686 сония натижа билан ўз гуруҳида 6-натижа қайд этди. Энди у ярим финал учун курашни давом эттиради.

6:10. Енгил атлетика: Аввалига спортчилар 100 метрга тўсиқлар оша югуриш баҳсида қатнашишди. Биринчи гуруҳда иштирок этган Воронина 14.19 сония натижа қайд этиб, ўз ҳисобига 952 очко ёзиб қўймоқда. 

6:09. Каноэда эшкак эшиш: Вакилларимиз Нилуфар Зокирова Дилноза Раҳматова ўз юришини бошламоқда. 

5:50. Енгил атлетика: Екатерина Воронина ўз иштирокини бошлади.

4 август куни Олимпиадада қатнашадиган ўзбекистонлик спортчилар:

5:35 - Енгил атлетика: Екатерина Воронина (кўпкураш)

6:05 - Каноэда эшкак эшиш: Нилуфар Зокирова

6:26 - Каноэда эшкак эшиш: Дилноза Раҳматова

7:30 - Эркин кураш: Жавраил Шапиев 

7:55 - Эркин кураш: Ғуломжон Абдуллаев

11:00 - Бокс: Баҳодир Жалолов

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию