Топ-5 чемпионатларнинг "чўкаётган кемалари"!

Европанинг кучли бешлик чемпионатларида мавсум тобора ўз якунига яқинлашмоқда. Чемпионлик учун кураш авжида ("Барселона" ва "Наполи"га тегишли эмас). Шунингдек, лигаларда жон сақлаб қолиш учун кечаётган курашни ҳам алоҳида таъкидлаб ўтиш лозим. 

АПЛ турнир жадвалининг қуйи қисмидаги вазият билан танишиб чиқишингиз мумкин. Қулайлик бўлиши учун жамоаларнинг сўнгги 5 учрашувдаги натижалари ҳам кўрсатиб кетилган. 



Премьер-лигада ҳаммаси қизиқарли тус олган. 12 ва 20-ўриндаги жамоалар орасидаги фарқ атиги 4 очкони ташкил этади. 

"Кристал Пэлас" энг ёмон формада бўлиб турибди. "Лестер" ҳамда "Борнмут" мундиалдан сўнг 8 очко тўплашга муваффақ бўлган. Бироқ Рой Хожсон шогирдлари "Opta" версиясига кўра, энг осон тақвимга эга бўлиб турибди. Уларни ўнталикда бораётган жамоалардан фақат "Тоттенхэм" ҳамда "Фулхэм"га қарши учрашув кутиб турибди. 

"Эвертон"да мураббий ўзгариши жамоа фойдасига ишламоқда. "Қатар-2022"дан кейинги даврни олиб қарасак, улар барибир энг ёмон кўрсаткичлардан бирини қайд этмоқда (23 та гол ўтказиб юборган).

"Вест Хэм" келгуси 2 турда нисбатан осонроқ рақибларга қарши майдонга чиқади, лекин уларни олдинда "Арсенал", "Манчестер Сити" ҳамда "Ливерпуль"га қарши беллашув кутиб турибди. 

"Эльче" турнирни тарк этиши ойдинлашиб бўлган. Улар 26 турдан сўнг атиги 13 очко жамғариб, 19-ўриндаги "Альмерия"дан 13 очко ортда бормоқда. 

"Валенсия"нинг аҳволи турнир жадвалида кўрингани каби ёмон эмас. Уларда ўйин сифати ҳамон юқори, аммо қандайдир сирли омиллар сабаб жамоа очко тўплашда сусткашликка йўл қўймоқда. Шунингдек, "кўршапалаклар" "ЖЧ-2022"дан сўнг энг ёмон кўрсаткичга эга - 12 ўйин, 7 очко. 

Мусобақани тарк этишга даъвогарлар сафидан "Сельта" чиқиб кетди. Виголиклар мундиалдан сўнг ўтказилган ўйинларнинг 6 тасида ғалаба қозониб, вазиятини яхшилаб олди. 

"Хоффенхайм" 2022/23 йилги мавсумни беқарор тарзда ўтказмоқда. 7 турдан сўнг 4-ўринни банд этган жамоа айни вақтда 15-поғонада бормоқда. "Герта" устидан қозонилган ғалаба туфайли улар хавфли зонани тарк этди. Шундай бўлса-да, аҳвол ҳамон оғир. 

"Шальке-04" ЖЧдан кейин 10 учрашувда 12 очко жамғарган бўлса-да, 17-ўринни банд этиб турибди. Ушбу қийин ҳолатдан чиқиб кетиш бироз мушкул бўлиши кутиляпти. Сабаби, сўнгги 3 турда улар "Бавария", "Айнтрахт" ва "Лейпциг" каби кучли жамоаларга қарши майдонга чиқади. 

Италия А Сериясида "Кремонезе" ҳамда "Сампдория" жон сақлаб қолиш учун курашда энг кам имкониятга эга жамоалар ҳисобланади. "Верона" ҳамда "Специя" ўртасидаги фарқ эса 5 очкони ташкил этади. 

"Кремонезе" сўнгги 5 ўйинда 5 очко жамғарган бўлса ҳам, ҳамон А Сериянинг энг ёмон жамоаси бўлиб турибди. 

Мазкур клубларга Италия гранди бироз "ёрдамлашиб" юбориши мумкин. "Ювентус" навбатдаги жазога дучор бўлиб, туринликлардан очко олиб ташланадиган бўлса, қуйи поғоналарда бораётган жамоалар жон сақлаб қолиши учун имконият яна ҳам ортади. "Кекса сеньора"дан 15-25 очко олиб ташланиши кутиляпти. Максимал жазо берилган тақдирда, уларнинг очколари сони "Сампдория" билан тенглашади. 

Франция чемпионатини тўртта жамоа тарк этади. Улардан бири, албатта, "Анже". Клуб сўнгги 20 та ўйинда 2 очко тўплади. 

"Аяччо" 13 беллашувда 10 марта мағлуб бўлган ва жуда кам гол урган - 6 та. Улар сўнгги пайтларда бу борада максимал сусткашлик қайд этган ва 7 учрашувнинг фақат 1 тасида гол уришнинг уддасидан чиққан. 

"Труа" сўнгги 20 та учрашувда фақат 1 та ғалабани қўлга киритган. "Брест" ҳамда "Стртасбур" ҳам хавфли зонага жуда яқин. Шунингдек, анчагина мавқеига эга бўлган "Нант" клубининг ҳам хотиржамликка берилишга ҳаққи йўқ. Устига-устак, улар сўнгги учрашувларда ғалаба нималигини билмай келмоқда. 



                                                                                                    Худайқулов Карим тайёрлади