"Тоттенхэм" "Арсенал" сотиб олмоқчи бўлган юлдузни ўз сафига қўшиб олиш арафасида

"Кристал Пэлас" ҳужумкор ярим ҳимоячиси Эберечи Эзе "Тоттенхэм" билан шахсий шартнома шартларини келишиб олди. Англиялик футболчи "бургутлар" сафини тарк этмоқчи. Бу ҳақда журналист Саша Тавольери Х ижтимоий тармоғидаги саҳифасида маълум қилди.

Манбага кўра, 17 август, якшанба куни бўлиб ўтадиган Англия чемпионати 1-туридан ўрин олган "Челси"га қарши баҳсда Эзенинг майдонга тушиши даргумон. "Кристал Пэлас" аллақачон 27 ёшли хавбекка ўринбосар топиш устида ишламоқда. Таъкидланишича, томонлар ўртасида зиддият келиб чиқмоқда.

Эслатиб ўтамиз, жорий йилнинг ёзида ОАВда "Арсенал"нинг Эзега қизиқиши ҳақида фаол хабарлар тарқалган эди. Лондон клуби Эзенинг трансферини 63,5 млн еврога келишиб олгани ҳақида маълумотлар пайдо бўлганди.

Ўтган мавсумда ярим ҳимоячи барча мусобақаларда 43 та ўйинда майдонга тушиб, 14 та гол ва 11 та голли узатмани амалга оширди. Эзенинг клуб билан амалдаги меҳнат шартномаси 2027 йилнинг ёзигача мўлжалланган. Трансфермаркт порталида келтирилган маълумотларга кўра, футболчининг бозор нархи 55 млн еврони ташкил этади.