"Тоттенхэм" ўз тарихида энг йирик трансферни амалга оширди

"Тоттенхэм" 21 ёшли португалиялик ярим ҳимоячи Матеуш Фернандешни "Вест Хэм"дан расман ўз сафига қўшиб олди.

"Бу қадамдан жуда хурсандман. "Тоттенхэм" – катта клуб, қароримда эса бош мураббий асосий омил бўлди. У билан суҳбатимиз алоҳида аҳамият касб этди. Футболга қарашларимиз ўхшаш: майдонга кучли жамоа сифатида тушиш, курашиш, энергия билан ўйнаш ва ҳар бир ўйинда ғалаба учун майдонга чиқиш. Иложи борича тезроқ ишни бошлашни, мухлислар билан учрашишни кутиб турибман", – дея таъкидлади Фернандеш.

"Мен Матеушни анча вақтдан бери кузатиб келаман. У тўп билан ишлаш маҳоратини биз учун жуда муҳим бўлган интенсивлик ва ўйинни яхши англаш билан уйғунлаштира олади. Ёшига қарамай, Премьер-лигада етарлича тажриба тўплади, бу даражада сифат ва барқарор ўйин кўрсата олди. Матеуш босим остида ҳам ўзини эркин ҳис қилади, тўпни олдинга ташийди, жамоа манфаати учун тинмай меҳнат қилади ва қийин паллаларда ҳам ташаббусни ўз қўлига олишдан қўрқмайди. Бу ерда унинг ривожланиши учун энг қулай муҳит бор, у билан иш бошлашни сабрсизлик билан кутаяпман", – деди "Тоттенхэм" бош мураббийи Роберто Де Дзерби.

Трансфер қиймати 85 миллион фунт (98,7 миллион евро) этиб белгиланди. Бу сумма клуб тарихида "Тоттенхэм" амалга оширган энг қиммат битим сифатида қайд этилди.