Трамп: Мен қарорни қайта кўриб чиқишларини сўрадим, чунки буни қоидабузарлик деб ҳисобламайман

АҚШ президенти Дональд Трамп ФИФАнинг Америка терма жамоаси ҳужумчиси Фоларин Балогунга қўйилган дисквалификацияни вақтинча тўхтатиш ҳақидаги қарорига муносабат билдирди.

Трампнинг таъкидлашича, у ФИФАдан ушбу масалани қайта кўриб чиқишни сўраган. Унинг фикрича, ўйин давомида ҳакамлар нотўғри қарор қабул қилган.

"Мен ФИФАдан текширув ўтказишни сўрадим. Жуда ҳурмат қилинадиган инсон [Жанни Инфантино] билан гаплашдим… Бу ишни амалга оширган одам – менман. Бу Байден эмас, Байден ухлаб ётарди!

Мен қарорни қайта кўриб чиқишларини сўрадим, чунки буни қоидабузарлик деб ҳисобламайман, бу ишни тушунаман. Мен бундан қоидабузарлик топмадим. Фақат қайта кўриб чиқишни сўрадим, бошқача қарор чиқаришларини талаб қилмадим", – дейди Трамп, журналист София Кайнинг ёзишича.

Шу тариқа, Фоларин Балогун Бельгияга қарши ўйинда майдонга тушиши мумкин бўлади. Унга нисбатан қўлланилган майдондан четлаштириш жазоси вақтинча тўхтатиб турилди. Ҳужумчи "Жаҳон чемпионати–2026"да ҳозиргача учта ўйин ўтказиб, учта гол урди ва бир марта голли пас берди.