Тревор Смит - Маҳмуд Муродов жанги олдидан қизиқарли фактлар ва маълумотлар

Хабарингиз бор, UFC билан шартномага эга бўлган ягона ўзбекистонлик жангчи Маҳмуд Муродов 8 декабрь куни ўзининг навбатдаги жангини Тревор Смитга қарши ўтказади.

UFC доирасида иккинчи жангини ўтказувчи Муродов ўзининг дастлабки жангида италиялик Алессио Ди Кирико (12−4) ни мағлуб этган эди.

Муродов Смитга қарши октагонга кўтариладиган "UFC on ESPN 7" турнирининг асосий жангида тажрибали ва машхур Алистар Оверим (45-17) Жаирзиньо Розенструйк (9-0) га қарши беллашади. Оверим ММАнинг энг кўп гонорар олувчи жангчилари рўйхатида Макгрегордан кейин, иккинчи ўринда туради.

Муродовга рақибликлик қиладиган 38 ёшли Смит фаолияти давомида 15 бор ғалаба қозонган бўлса, яна 4 тасида мағлубиятга учраган. Эътиборли томони, Смит сўнгги 4 та жангининг 3 тасида ютқазган.

Дастлаб, Эндрью Санчес (8-2), кейинчалик Элиас Теодору (14-2) га ва сўнгги бор шу йилнинг бошларида Зак Каммингс (21-6) га имкониятни бой берган.

"UFC оn ESPN 7" АҚШнинг Вашингтон штатида бўлиб ўтади. Қизиғи Муродовнинг рақиби айнан ушбу штатда машғулотлар ўтказади ва жанг давомида Смитни қўллаб-қувватловчилар сони кўпчиликни ташкил этиши кутилмоқда.

Tapology.com сайтининг сўровномасига кўра, мухлисларнинг 91% қисми Муродовнинг ғалабасига ишонч билдирган ва яна 9 % қисми Смитга. Сўровномада умумий 781 та овоз берилган.

Ушбу сайтнинг ўрта вазн тоифасидаги (-84 кг) рейтингида Маҳмуд Муродов аввалги рақиби Алессио Ди Кирикодан бир поғона юқорида, 36-ўринда қайд этилган. Смит эса ҳамюртимиздан икки баробар пастки поғонадан яъни 72-ўриндан жой эгаллаб турипти. Рейтингни энг юқори, биринчи поғонасида Исроиль Адесанья қайд этилган.

Маҳмуд Муродовга тўхталадиган бўлсак, у фаолиятини 2012 йилда бошлаган. XFN, NW ва Оktagon ММА ташкилотларидаги жанглари билан машхурликка эришган. Муродов 2019 йили UFC билан шартнома имзолади. 29 ёшли жангчи унчалик машхур бўлмаган К1EL промоушени ҳомийлигида дебютини бошлаган. Ўтган 7 йил давомида ҳамюртимиз 22 та ғалабага эришган ва 6 та мағлубиятга учраган. Ўрта вазн тоифасида беллашувчи жангчимиз шу йилнинг ўзида 3 бор октагонга кўтарилишга улгурди.

Бокс бўйича собиқ жаҳон чемпиони Флойд Мейвезер ўзининг "Instagram" тармоғи орқали Маҳмуд Муродовнинг суратини жойлаб, ММАнинг энг зўр жангчиси, деб ёзди. Шундан сўнг, Муродовнинг машхурлиги янада оммалашиб кетди. Ҳаттоки, UFCнинг машхур аъзоларидан бири Дональд Серроне шундай изоҳ қолдирган: "Мен бу йигитни адабини бераман."

Ўз навбатида, Муродов ҳам жавоб қайтарган: "Уриниб кўр!"

Муродовнинг машхурлиги борасида, унинг агенти Люсьен Бакос шундай деган: "Маҳмуд Муродов Чехиянинг ҳақиқий юлдузи. У энг катта ареналарда 5 минглаб чипталарнинг сотилишига сабабчи. Энг катта аренада, у 17,5 минг мухлисни тўплай олган. Флойд Мейвезер унинг устози ҳисобланади, аммо бу ҳақида бошқа реклама қилмайди."

Муродов Мейвезер билан қандай танишганлиги борасида шундай деган: "Биз Чехияда танишганмиз. У бокс оқшомига фахрий меҳмон сифатида ташриф буюрган. У мени кўриб, бош бармоғини кўрсатди. Шундан сўнг, унинг менежери ва хавфслизлик ходимлари ёнимга келишган. Улар мендан жангларимни кўрсатишимни сўрашган ва жангларим Мейвезерда яхши таассурот қолдирган."

2018 йили Ўзбекистон фуқаролигига эга бўлган Маҳмуд Муродов, ҳозирда UFC аъзоси ҳисобланади.

Эслатиб ўтамиз, Муродовнинг 8 декабрь куни бўлиб ўтадиган жангидан ташқари, UFC билан яна 2 та жанг учун битими бор.