ЦСКА Файзуллаевни Осиё кубогига қўйиб юбормаётганига муносабат билдирилди

Қатар апрель ойида яна бир нуфузли мусобақага мезбонлик қилади. Осиё футбол марказига айланиб қолган ушбу мамлакат стадионларида 23 ёшгача бўлган футболчилар иштирокида Осиё чемпионатида ўтказилади.

Бу галги мусобақа ёзда Франция пойтахти Париж шаҳри мезбонлик қиладиган Олимпия ўйинларига саралаш турнири вазифасини ҳам ўташи унинг аҳамиятини бир неча баравар оширади.

Қоидага кўра, дастлабки учта ўринни эгаллаган терма жамоалар тўрт йилликнинг энг нуфузли мусобақасига йўлланма олади, тўртинчи ўрин соҳиби эса, курашни қитъалараро плей-оффда давом эттиради.

“Осиё кубоги - U23” мусобақаси ФИФА кунларидан ташқарида ўтказилаётгани таркибни шакллантиришда муаммоларга сабаб бўлмоқда. Яқинда Франциянинг “Ланс” ва Россиянинг ЦСКА клублари ўзбекистонлик легионерлар – Абдуқодир Ҳусанов ва Аббосбек Файзуллаевни Қатардаги мусобақага қўйиб юбормагани ҳақида хабар тарқалди.

Бунга Аббосбек Файзуллаевнинг биринчи мураббийи Дмитрий Ан ўз муносабатини билдирди.

-  Ватанпарвар фуқаро сифатида Аббосбек Файзуллаевни ёшлар ўртасидаги Осиё кубогида ҳам кўришни истайман. Аббос ёшлар терма жамоасининг асосий ўйинчиларидан. Уни бу мусобақада кўришни хоҳлайман, лекин ЦСКА уни қўйиб юбормай тўғри қиляптими ёки йўқ, буни муҳокама қилиш менинг ваколатимга кирмайди.

Файзуллаев мана шу клубга тегишли ва нима қилишни улар ҳал этади. Лекин терма жамоада қандай ўйнашини кўргим келяпти.

У Осиё кубогида ҳам, жаҳон чемпионатининг саралаш учрашувларида ҳам ўйнади. Ҳозир мусулмонларда Рамазон ойи. Балки Файзуллаев жисмоний жиҳатдан тўлиқ тайёр эмасдир. Биз у билан Гонконгга қарши ўтказилган учрашувдан олдин учрашган эдик. Менга тайёргарлигини айтганди, лекин ўйин сифатига рўза тутаётгани таъсир қилаётган бўлиши мумкин, - деди Дмитрий Ан championat.com  сайти журналисти Мария Куцубеева билан суҳбатда.

Ўзбекистон U23 терма жамоаси Осиё кубогининг саралаш турнирини юртимизда ўтказиб, Эронни 1:0, Гонконгни 10:0, Афғонистонни 8:1 ҳисобида мағлубиятга учратиб, мусобақанинг финал босқичига биринчи ўринни эгаллаган ҳолда чиқди.

Қатардаги қитъа биринчилигида ҳамюртларимиз “D” гуруҳидан жой олган.

Ўзбекистон ёшлар терма жамоаси гуруҳдаги илк учрашувини 17 апрель куни Индонезияга қарши ўтказиши белгиланган.

Футболчиларимиз 20 апрелда иккинчи баҳсни Кувайт вакилларига қарши ўтказади. Гуруҳдаги сўнгги ўйин 23 апрелда Вьетнамга қарши бўлади.

Ўзбекистон U23 терма жамоаси 2018 йили Хитойда бўлган мусобақада чемпионликка сазовор бўлган.

Икки йилдан кейин ҳамюртларимиз Таиландда тўртинчи ўринга лойиқ топилди. 2022 йили Тошкент шаҳри мезбонлик қилган Осиё чемпионатида футболчиларимиз иккинчи ўринни қўлга киритган эди.